Gij baksieng gwnz gahengh de youh naeuh lo, mbouj dingz lae raemxnong, saekhau saekhoengz dox- gyauz, gyanghwnz duzsap dwgcaengz sup gij baksieng de, gyangngoenz duznengznyaen youq henz gahengh de mbinfogfog. Seiz mbwq, de hix bungj gahengh, aeu diuz fiengz gviq noh- naeuh ndaw baksieng, gvet gij raemxnong roengzdaeuj, youq ndaw uk naemj duz ngwzndaem bihaenx haeb de.

Sojmiz bouxvunz caeuq gij saeh cungj menhmenh youq ndawsim de siusaet lo, doeklaeng cij lw duz ngwzndaem haenx, aenvih Lungz Byauh daj gij baksieng gwnz gahengh cigsoh siengj daengz duz ngwz haenx, de hainduj haemz duzngwz, it sim it eiq haemz duzngwz!

Daihcibroek Aulungzgveiz Gangj Goj (Daihgouj)

Mwhneix, de youq ndaw gamlauz roxnaj le goengfamh byomnyieg he, de baenzngoenz cungj mbouj oksing, ninz youq gwnz dong fiengz, laep da ngeixloek, caemrwdrwd ndaej hawj vunz laihnaeuz de gaenq dai lo.

Caenh Lungz Byauh hemqyuyu, bouxfamh wnq cungj gvaiq de goenjcauz lai, cijmiz de mbouj cam mbouj dam, cij saekseiz cengq da yawjyawj Lungz Byauh baez song baez, lumj gaenbonj mbouj ndaejnyi Lungz Byauh swenjoen nei.

Doeklaeng, Lungz Byauh caem roengzdaeuj lo, cij haeujsim boux goengfamh neix, cungj laihnaeuz ceiq lai mbouj ndaej geij ngoenz couh deng ram okrog bae lo. Hoeng byawz liuh ndaej daengz geij ndwen gvaqbae lo, de vanzlij ninz youq gizhaenx, lij caengz dai.(caengz sat)