“Fwnmoenq dumz namhsa, rumz bae ra mbaw gyoij. Cin daengz mbawfaex oiq, vagimngaenz ok doih. Boh nda vaiz cae naz, dahlwg caemz doekmeih. Makseq cug daengz seiz, goep heij heuh epep.” Geij ngoenz daeuj, doeg souj sei《Cohah Ndaemnaz Ndaw Fwn》, gou lumj raen fuk veh gyaeundei lajmbanj youq doiqnaj nei, lumj ndaej raen bouxguhnaz cae naz, vagimnganz rangfwdfwd, duzgoep heuh’epep……

Souj sei ndeu, fuk veh ndeu, cungj hawj vunz ngeix mbouj lumz; go faex ndeu, duj va ndeu, cungj hawj vunz doengh daengz ndawsim. Gij vagimngaenz mwh lij iq hai doh doengh ngoenzneix couh youq ndawsim gou hai angj lo, gij rang lumj mbin haeuj ndaw ndang gou daeuj nei.

Gou dauqngeix seiqcib bi gaxgonq, seizhaenx, ndawranz gungzhoj, haeux gwn cungj yaek mbouj miz. Vunzhoj danggya vaiq, godaih cejdaih lij doegsaw, gou ngamq ndaej bet bi couh rox dawz beh bae gip haexvaiz, cib bi couh rox riengz bouxlaux haeuj ndaw rungh bae aeu byaekcwx. Daj seizde hwnj, gou couh roxnaj go vagimngaenz lo. Seizde, gou mbouj rox go vagimngaenz baenz gai, hoeng nanz mbouj nanz raen boux goenglaux ndeu haeuj mbanj daeuj, ngauz aen lingz ndeu heuh:“Sou vagimngaenz lo—— Sou vagimngaenz lo——”. Sing heuh goksasa, byotletlet.

Gou deng gij sing cauz neix ndiu ninz lo, gyoekgingj hwnqdaeuj, haiz mbouj daenj couh buet coh gij sing heuh bae. Gou raen boux goenglaux daenj aen gyaepmeg ndeu ndwn youq cungqgyang, gyoengq mehmbwk ndaw mbanj fwngz riuj aen daehbaengz, cingq humx ndaej ndaetndaet bae, aen ndaeng gou faemxfwt mup ndaej gij heiqrang dujva, gou couh rox dwg vagimngaenz lo. Gou raen gyoengq mehmbwk ndaw mbanj ndenq vagimngaenz hawj boux goenglaux, boux goenglaux couh ndenq ngaenz hawj gyoengq mehmbwk, hawj gou cim ndaej lwgda yaek doek bae.

“Vagimngaenz, vagimngaenz.” Gou doq gangj doq buet dauq baema. Ngoenzde, gou nauh daxmeh yaek riengz de haeuj rungh bae mbaet vagimngaenz.Daxmeh ngaekgyaeuj hawj bae lo, de aeu diuz hanz faexndoek ndeu, nda song aen mbaij, aen mbaij ndaw cang cukhaeuxyangz, cukhaeuxyangz saw ndaej yaek raen ngaeuz. Dou hwnj roen lo, gou byaij bae gonq, daxmeh byaij youq riengz laeng, mehlwg boux gonq boux laeng byaij haeuj ndaw bya bae. Daxmeh raen gou byaij naiq lo, hanh lae roengz najbyak daeuj, de doq aeu genbuh bang gou mad hanh doq naeuz:“Lwg ha, meh son hot go lwgngez hawj mwngz, angq mbouj angq?” Gou riu naeuz:“Angq, angq!” Daxmeh doq byaij doq son:

“Mwngz hai youq laj daengngoenz, coh heuhguh vagim,

Mwngz hai youq lai ronghndwen, coh heuhguh va’ngaenz,

Va mwngz ronghriri, bouxlawz daeuj ndaej beij?

Gaeu mwngz heu, mbaw mwngz loeg, yawj bae daengx da doek,

Daeuj lo daeuj,

, Vagimngaenz, mwngz miz cingz, mwngz miz eiq……”

Daxmeh son coenz ndeu, gou couh riengz coenz ndeu; daxmeh ae bak ndeu, gou caemh ae bak ndeu, nyex ndaej daxmeh riu mbouj daengx. Mbouj rox mwhlawz, dou couh byaij daengz dieg hai vagimngaenz gwnzbya lo.

Vagimngaenz maj baenz gaeu, de gyaez bin hwnj gwnz rin sang, caemh maij bin hwnj gwnz gofaex. Daxmeh aemq aen daeh baengzndaem, hawj gou youq mbiengj daemq mbaet, de couh bin hwnj diegsang bae, lumj duzrwi mbaet va nei. Daxmeh doq gip va doq eu fwen hwnjdaeuj:

“Ha……leux……

Cib rungh doiq gouj bya,

Rwi bae ra vadiengz,

Rwi vih va daisieng,

Sanhbwz siengj Yinghdaiz.

Ha……leux……

Cib rungh doiq gouj dat,

Raemx gat loh song baih,

Go ram rin daeuj vaij,

Giuhva caix gvaq raemx.

Ha……leux……”

Daxmeh eu fwen rwenzrub, sing fwen hap langh youq ndaw bya. Lienz duzroeg youq ndaw ndoeng ciuz hix dingz roengzdaeuj, lumjnaeuz dingq ndaejnyi sausien guh fwen nei, caiq mbouj gamj heuh lo.（1）