3 Nyingz

“Vei, maex ndei gou,” nyaenma sienseng youh cam naeuz, “haemh- neix naemj gwn gijmaz ni?”

“Haemhneix raeuz couh gwn bit,” maex nyaenma han naeuz, “mazfanz mwngz loengh song duz bit biz ma hawj dou, gou caeuq mwngz duz ndeu, gyoengq lwg duz ndeu.”

“Bit couh bit,” nyaenma sien- seng naeuz, “bit Banghswh ndei dangqmaz.”

“Itdingh aeu siujsim.” Maex nyaenma daengq de.

“Maex ndei gou,” nyaenma sienseng naeuz, “daj rog sam leix, gou couh nyouq raen gij heiq geij duz huk haenx, gou nyouq ok gyoengqde bouxlawz dwg bouxlawz. Gwnz ndang Bozgizswh daiq miz gij heiqhaeu naenggaeq naeuh, Banghswh daengx ndang haeu daep hanq, gangj daengz Bijwnh, heiq laeuj makbingzgoj lumj ngaeuz nei seizseiz gyam youq laj din de.”

“Vah gangj ndaej mbouj loeng, hoeng wnggai siujsim lij aeu siujsim bw.” Maex nyaenma naeuz, “mwngz goj rox gyoengqde youq gizhaenx caj youq gaeb mwngz, gyoengqde sam boux.”

“Mwngz couh gaej you lo,” nyaenma sienseng han naeuz, “gou bae gonq lo.”

Daeuz, danghnaeuz mwhhaenx nyaenma sienseng liuh daengz Bozgizswh gyoengqde cingqcaih youq gizlawz caj gaeb de, de aiq mbouj baenzneix gag raen deng lo. Bozgizswh gyoengqde seizneix couh ndoj youq rog bakcongh, gak boux gag maeuq youq raeblaeng go faex ndeu, ndaw fwngz yaengx fagcungq hwnj gvaq dangz. Gyoengqde lij haeujsim sijsaeq senj aeu dieg ndoj ndang, baujcingq rumz mbouj dwg daj raeblaeng gyoengqde baed haeuj ndaw congh nyaenma bae, cix dwg dauqbyonj. Baezneix, nyaenma sienseng couhdwg siengj “nyouq” goj “nyouq” mbouj raen gyoengqde lo.

Nyaenma sienseng riengz diuz deihgoengq ndaemnyamnyam benz hwnjdaeuj. Daengz bakcongh yaq le, de iet aen naj gyaeundei de ok rog daeuj gonq, youq ndaw ndaemnyam nyouq geij mbat. De nod gvaq baihnaj bae seiq haj conq, couh daengx roengzdaeuj lo. De youh nyouq, mwh de ndonj ok congh daeuj, de cungj dwg siujsim dangqmaz. De youh nod gvaq baihnaj bae di ndeu, byongh aen ndang daj ndaw bakcongh iet okdaeuj lo. De nyaeuq aen ndaeng ndaem mbiengj neix nyouqnyouq, mbiengj haenx nyouqnyouq, mbouj raen gijmaz heiqsik yung’yiemj. De cingq yaek ni haeuj ndoengfaex baihnaj bae, sawq- mwh dingqnyi——Roxnaeuz gangj, dwg de roxnyinh de dingq ndaej nyi di sing yomjyomj ndeu. Cungj sing caca yomjyomj ndeu, lumj miz vunz youq gwnz dong mbawfaex hauq ndeu yomjyomj、yomjyomj nod doengh aen ga mbat ndeu. Nyaenma sienseng bamq roengzdaeuj, nem youq gwnz dieg, doengh goj mbouj doengh saek di daengj song aen rwz hwnj, dingq haujlai nanz lo, cix dingq mbouj ndaej nyi gijmaz nawning.

(caengz sat)