Mwngz daj rog yawj hagdangz gou mbouj miz maz ndeiyawj, gizsaed ndaw hagdangz gou ndeiyawj raixcaix! Mbouj saenq? Gou daiq mwngz bae yawjyawj ba.

Hagdangz gou dieg lawz cungj ndeiyawj, seizneix gou daiq mwngz bae dieg miz go faexmoegmienz gonq ba. Seizcin daengz le, faexmoegmienz haiva lo, hoengzyanyan ndeiyawj raix- caix. Danghnaeuz mwngz daj gizgyae yawj bae, laihnaeuz dwg boux lwgnyez lawz mbouj siujsim aeu feiz coemh dawz ne. Haeuj gyawj baez yawj, yienzlaiz dwg daengx gomoegmienz cungj dwg vamoegmienz, gyoengqde mizmbangj hai hoengh lo, lumj feiz- mbaw hoengzfwdfwd; mizmbangj hai ndaej buenq lo, lumj dahsau najmong mbouj gamj loh naj okdaeuj; miz- mbangj lij dwg lupva, lumj baenz aen baenz aen gyangq venj dauqdingq youq gwnz nga……Mwngz yawj gyoengq doengzhag gip gij va loenq haenx baij baenz duzbit、 duzgaeq、duzma……Mizmbangj doengzhag lij dawz de guhbaenz vadoix, cubyouq gwnzciengz.

Baihswix gomoegmienz dwg vwnzva cangzlangz, de raez samcib mij, gvangq miz sam mij. Song henz vwnzva cangzlangz gaisau hajcib roek aen minzcuz guek raeuz gag miz gijmaz daegsaek, roengzdangz le, dou naengh youq henz gyoengqde yawj saw、 sij cozyez、 guh’angq, ngoenz- ngoenz gvaq ndaej simvuen dangq- maz.

Baihgvaz gomoegmienz dwg song aen giuzciengz、song gyaeuj giuzciengz dwg aen congz binghbanghgiuz, diuz- roen buet songbak mij raez heux baih- rog gyoengqde, dou dwkgiuz mbwq le couh bae diuzroen buet song sam hop, caiq dauqma gyausiz doeg saw.

Baihnaj gomoegmienz dwg aen ciengz dwk yijmauzgiuz, mizseiz baed rumz le, rumz baed vamoegmienz roengzdaeuj gwnz dieg hoengzfwdfwd, lumj seiz aeuyah bu denznding, ndeiyawj raixcaix; baihlaeng gomoeg- mienz dwg aennyenz, saek aennyenz henj lumj gim, ndang nyenz gaek miz duzlungz、duzgaeq、duzfungh- vuengz……Gyoengq doenghduz, duzlungz mbinfifi, duzfungh heux duzlungz diuq foux, gyoengq doengh- duz heux seiqhenz yawj, caen ndei- yawj.

Baenzlawz yiengh? Gizneix cij dwg ndaw hagdangz dieg ndeu, giz- saed dieg lawz cungj gyaeundei raixcaix, danghnaeuz mwngz daeuj hagdangz gou, gou daiq mwngz menhmenh yawj ba!

(Vujsenh Yen Dungzlingj Cin Sinhlungz Siujyoz Veiz Veivei boux lauxsae son’gyauq Lungz Ging’yiz)