Ngoenzhaenx, daxboh dax- meh daiq gou bae denyingjyen yawj denyingj 《Cangzcinhhuz》. Daxboh naeuz, neix dwg bouh benq haenh Cungguek Yinzminz Ciyenginh mwh ciengz ciengq hoenx Meijgoz bang Cauzsenh, lwnhgangj ciengz ciengq Cangz- cinhhuz bi 1950 haenx, bing ciyenginh ginggvaq vut mingh hoenx ciengq, hingzndaej bouh gig youqgaenj ciengz ciengq hoenx Meijgoz bang Cauzsenh. Mwh youq bakdou cawx biuq, boux dahcej gicej ndeu caijfangj daengx ranz dou. Gou youq baihnaj gingdouz miznaj naeuz： Gou yaek engqgya roengzrengz、ndeindei hagsib, hawj guekgya bienq ndaej engqgya hung’ak.

Ndaw denyingj, bing ciyen- ginh vih henhoh guekgya, caeuq bing Meijgoz doxhoenx haenqrem. Gyoengqde naeuz, danghnaeuz gyoengqde mbouj hoenx ciengz ciengq neix, couh louz hawj daihlaeng. Ndigah, couhsuenq mizmbangj lenzdui bing daengx lenz cungj deng nit dai youq gyang nae, gyoengqde hix mbouj lau dai, buekguh baenaj. Boux cienghginh Meijgoz ndeu naeuz：“Najdoiq bingdoih eiq- ceiq maenh’ak baenzneix, raeuz ciengxlwenx hoenx mbouj hingz!”

Daj ndaw denyingjyen ok- daeuj, gou ngiengx gyaeuj yawj- raen lajroq venj miz vujsingh- hungzgiz.“Daxmeh! Mwngz yawj, geizguek!” Gou nyaenx mbouj ndaej heuh, yamq din baenaj, simcingz gikdoengh ndwn youq baihlaj geizguek, yaengx sang fwngzgvaz gingqlaex Cungguek saunenz senhfunghdui yiemzrwd. Daxboh daxmeh guhmuengz dawz soujgih okdaeuj ingjsiengq, geiq- loeg gijneix roengzdaeuj.

Seizneix, geizguek youq gyangmbwn mbinyagyag, gou ndwn youq yiemzrwd, simcingz gikdoengh, ndaengndiengq miz- naj. Seizneix, gou roxyiuj le gij raeuj caeuq rengz、 maenh’ak caeuq gengrengz daxmeh guekcoj laegdaeuq. Seizneix, gou roxnyinh le gij yienzaen mbouj hingz ndaej raeuz.

Gou naemj, bannomj daih raeuz, mbouj ndaej vei bing ciyenginh fouzsei guh’ok, itdingh insik ndwenngoenz gyaeundei seizneix, hag ndei bonjsaeh, hwnjguh ndei guekcoj, baujhoh ndei beksingq, hawj vujsingh- hungzgiz ronghsien ciengxlwenx mbinyagyag youq cungqgyang aen daizheiq seiqgyaiq!

(Nanzningz Si Denhdauz Saedniemh Hagdangz Yinzsanh Yaugih Banh Swjcen)