Bi 2021 ndwen 7 ngoenz 7 singgeiz sam ndit

Ngoenzneix gou bae ranz doengz- hag sij cozyez, baez haeuj bakdou. Va! Duz ma neix caen hung ha! Daengx ndang bwn henjhoengz, aen’gyaeuj gig hung, aenbak gvangqgumgum, diuz linx iet okdaeuj raezrangrang, saek hoengzoiq, lij rih myaiz dem. Aen- ndang hunghwd, diuz rieng gungjgwd, lumj gaiq sauqbaet nei. Byaij loh caekhaex niuj bae niuj dauq, dingq- gangj duzma miz caetcib gaen lij naek gvaq gou ne. De dwg duzma Lah- bulahdoh, mingzcoh heuh Beibei.

Beibei ngamq raen gou, mbouj leix gou geijlai. De ndwn hwnjdaeuj, sing hung raeuq gou, aiq naemj daeuj haeb caekhaex gou？Youh lumj naeuz:“Mwngz cawx noh daeuj hawj gou gwn ma? Mwngz mbouj cawx daeuj gou couh haeb caekhaex mwngz.” Gou mbouj lau saek di, youq ranzdaiq gou raen duzma lai lo.

Gou couh hainduj sij cozyez, Beibei daeuj nyouq caekhaex gou, gou mbouj lau, aenvih gou bae ranzdaiq miz bang ma ndeu daeuj nyouq gou gvaq, gyoengqde hix mbouj haeb gou, ndigah gou mbouj lau Beibei.

Seiz yietnaiq， gou couh bae lumh duzma, gwnz ndang de bwn nanwtnwt，lumj daenj geu buhfaiq，Beibei doiq gou bi diuzrieng, lij nyouq din fwngz gou, riz gouhhaiz gou, nanzdauh gouhhaiz gou nem miz haex ha？

Seizneix，gou yied daeuj yied gyaez duz ma neix lo.

Bi 2021 ndwen 7 ngoenz 8 singgeiz seiq ndit

Ngoenzneix gou yawjraen Beibei, aenmbei gou lai hung gvaq lo.

De ninz youq bakcanz gizhaenx, gou byaij gvaqbae lumh aen’gyaeuj de, de leix cungj mbouj leix gou, gou baez iet fwngz, de couh ndwn hwnj- daeuj, gou gwih hwnj baihlaeng de bae, gwih hwnjbae gig cwxcaih. Doeklaeng de youh ninz youq gwnz dieg, gou dawz cik din gou cuengq gwnz gyaeuj de bae, de couh ngiengx gyaeuj nyouq lwgdin gou，gou raen yinx dangqmaz.

Yaep ndeu, de ninz gwnz dieg, gou byaij gvaqbae, de dingqnyi le, couh hai da yawj, de yawjraen gou, ndwn hwnjdaeuj, doiq gou bi diuz- rieng. Gou gyajcang bae gej diuzcag cug de haenx, de laihnaeuz diuzcag gej hai lo, couh sikhaek cung ok bakcanz bae, hoeng de youh deng diuzcag rag dauqma, caen ndei riu.

Duzma hung Beibei, caen miz- yinx.

（Sanglinz Yen Dafungh Cin Cungsim Hagdangz seiq nienzgaep Cinz Cihsan boux lauxsae son- gyauq Mungz Cwngzgen）