1 Sam Boux Bouxcawj Ciengz Dajciengx

Ndaw lueg miz sam aen ciengz dajciengx. Bouxcawj sam aen ciengz dajciengx guenjguh ndaej gig ndei. Gyoengqde cungj dwg vunz miz cienz, hoeng hix cungj dwg vunz yakrwix. Sam boux de caen dwg vunz ceiq yakrwix、ceiq maetmi mwngz bungz raen gvaq haenx. Mingzcoh gyoengqde dwg Bozgizswh、Banghswh caeuq Bijwnh.

Bozgizswh dwg bouxcawj ciengz ciengx gaeq. De ciengx miz geij cien duz gaeq. De biz dangqmaz, neix dwg aenvih, de ngoenz sam donq aeu gwn sam duz gaeqdumq, gwnz gaeq goemq caengz budingh mak nanwtnwt ndeu.

Banghswh dwg bouxcawj ciengz ciengx bit hanq. De ciengx miz geij cien duz bit caeuq hanq. De dwg boux daemqdet hoeng bizbod yodlod ndeu. De daemq dangqmaz, ndwn youq dieg raemx feuz gyang aen daemzapraemx lawz gwnz seiqgyaiq, hangz de cungj deng raemx dumh gvaqbae. Doxgaiq de gwn dwg mienhbaucaq caeuq daephanq. De aeu daephanq daem baenz gij giengh hawj vunz raen couh naemj rueg, menhcij dawz de oet haeuj ndaw mienhbaucaq bae. Ciengzseiz gwn cungj doxgaiq neix, de couh dungx in, singq gaenj.

Bijwnh dwg bouxcawj ciengz ciengx gaeqhojgih caeuq suen makbingzgoj. De youq ndaw suen makbingzgoj ciengx miz geij cien duz gaeqhojgih. De gaenbonj couh mbouj gwn gijmaz doxgaiq, cix gwn laeuj makbingzgoj get lai, cungj laeuj neix dwg de yungh makbingzgoj ndaw suen mak bonjfaenh gag siu. De byom lumj gonj yienzbit nei, ndaw sam boux de, de dwg boux ceiq coengmingz.

Bijwnh、Banghswh、Bozgizswh,

Boux byom boux daemq boux bizbod.

Sam boux vunzyak caen dwg vaih,

Danaj yienznaeuz mbouj doxdoengz,

Mbouj miz saek boux mbouj damqcaiz.

Lwgnyez ranz youq henzgyawj raen gyoengqde, couh baenzneix ciengq.