Daxbuz youq lajmbanj, saeh gou ceiq gyaez guh couhdwg ngoenzgyaj bae ranz daxbuz lajmbanj, aenvih gou roxnyinh lajmbanj yienghyiengh cungj geizheih.

Daxbuz ndang mbouj sang, byoem gaenq hau lo, cungj dwg gyaez riunyumnyum, yawj hwnjbae sienh dangqmaz. Gyoengq vunz ranznden cungj naeuz de sienhsoh dangqmaz, hoeng, gou lwnh mwngz, de gizsaed dwg boux “beizheiq gaenj”. Daxbuz hozhwnj , caen dwglau raixcaix.

Miz baez ndeu, gou caeuq nuengxbiuj youq goekciengznamh gyanghongh guhcaemz, songdou loengh “ma vat ciengz”. Vat namhhenj biqbumbum goekciengz lij yinx gvaq vat sa henzhaij. Yaep ndeu, goekciengz couh miz song aen congh lo. Mwh song duz “ma iq” vat ndaej cingq yinx, sawqmwh baihlaeng gou deng dop mbat naeknaek ndeu, cadi deng laemx.

Gou baenq ndang yawj, a, yienzlaiz dwg daxbuz. De cingq capeiq, da daengx ndaej lumj aen dienhdaeng nei, lumjbaenz seizseiz cungj dop gou mbat moq. Gou deng hwk dwk ndang saenzdedded, dan dingq nuengxbiuj hemq：“Vaiq buet!” Song dou sikhaek couh buet.

Daxbuz aiq dwg nienzgeij laux lo buet mbouj ndaej, couh mbouj gyaep dou.

Dauq daengz ranz, gou caeuq daxmeh naeuz gienh saeh neix, gou hozhwnj cam daxmeh：“Daxbuz dauqdaej gyaez gou lijdwg gyaez ciengz？”

Daxmeh yawj gou riu naeuz:“Dangyienz gyaez mwngz ha! Mwngz sijsaeq naemjnaemj yawj, danghnaeuz gyoengqsou vat ciengz lak lo, dauqdaej baenzlawz yiengh？”

Gou mbouj gangjvah ngaem gyaeuj roengzdaeuj, lumjbaenz rox daxbuz vihmaz hozhwnj lo. Daxbuz lijdwg gyaez gou!

(Ngeih nienzgaep Ciz Gozcinh)