Ranz gou dwg aen “suendoenghduz” iqet ndeu, ndawde miz “duzvaiz” daxboh， “duzdoq” daxmeh，“duzmou” daeggo，lij miz gou lumj duzlingz nei.

Lwnh diuz saeumeh ndawranz gonq——Daxboh. Daxboh lumj duz vaiz ndeu, rengz hung raixcaix. Moix baez buen doxgaiq, gou caeuq daxmeh cungj buen mbouj ndaej, daxboh gvaq daeuj baez vaz, couh dawz doxgaiq riuj bae, daxboh caen dwg rengz hung lumj duz vaizdaeg nei. Daxboh gou mboujdan rengz hung, lij gaenx guh raixcaix, daxboh moix ngoenz youq gunghswh hwnjban, guh hong ciepdaih bouxhek, mbouj ndaej ciengzseiz caeuq gou youq, moix baez cam daxboh youq gizlawz? Mbouj yungh gangj，daxboh itdingh dwg cingq hwnjban, daxboh vihliux ndwenngoenz gyoengqdou gig roengzrengz, caen dwg duz “vaizlaux” gaenx guh ndeu.

Daxmeh gou lumj “duzdoq” ndeu, vihmaz ne? Aenvih daxmeh gig sienhsoh, youh maij seuqset, moix baez gwn ngaiz, de cungj swiq fwngz seuq gonq caiq gwn, gwn sat le lij aeu ut daiz seuqset, bingzseiz buhvaq gwnz ndang cungj dwg youh seuq youh cingjcaez. Daxmeh lumj duzdoq buet ndaej vaiq. Miz baez ndeu, gou caeuq daxmeh doxdax buet, ngamq naeuz “hainduj”， daxmeh couh cung coh baihnaj, gou baenzlawz gyaep cungj gyaep mbouj ndaej, daxmeh baeg lo, couh buet menh lo，gou yawjraen le, sikhaek yamqdin buet daengz baihnaj, caeuq daxmeh buet ndaej doxcaez.

Naeuz daeggo gou ha, de caen lumj duz mou bizbwdbwd ndeu. Vihmaz ne? Aenvih daeggo gwn le couh siengj ninz, guhcaemz yaep ndeu youh siengj gwn, ndigah daeggo gou couh yied daeuj yied biz, de sang 1.7 mij, daihgaiq miz 150 gaen. Mehbaj caeuq mehgux gou cungj naeuz:“Lan! Vaiq bae lienhndang gemj biz! Mwngz caiq mbouj bae gemj biz, mboujdan biz lumj duzmou, hix yaek bienqbaenz duzciengh hung lo.” Hoeng daeggo vanzlij dam gwn gik guh, gyaez guhcaemz, mbouj baenz duzmou cij gvaiq ne.

Gou ne， lumj duzlingz iq, aenvih gou byom lai，gwn doxgaiq gig noix, lij genjgwn, caeuq daeggo beij couh ca gyae lo, gou yaek gwn haeux lai di，yaek sang gvaq daeggo cij ndaej. Gou dwg boux maij doengh, sij cozyez cungj dwg doengh bae doengh dauq, mizseiz laeglemx guhcaemz, mizseiz gyajcang bae oknyouh, daxmeh naeuz:“Mwngz caen dwg vunz gyaez doengh ha, lumj duzlingz nei mbouj dingz gvaq, vaiqdi sij cozyez!” Gou dingq le, sij yaep ndeu, mbouj geij nanz youh doengh bae doengh dauq lo.

Neix couhdwg “suendoenghduz”iqet ranz gou, dou youq gizneix gvaq ndwenngoenz gig haisim、vuenyungz, gou gyaez ranz gou.

(Sanglinz Yen Dafungh Cin Cunghsinh Hagdangz seiq nienzgaep Cinz Cihsan boux lauxsae son’gyauq: Mungz Cwngzgen)