Seizcin daengz lo, youq ndaw aen suenva gyaeundei ndeu, va hoengzhoengz heuheu cungj hai lo, ndaw suenva miz duzrwi iq gaenx caeuq duzmoed iq gik.

Ngoenz ndeu, duzrwi iq gaenx cingq aeu dangz, caepcawq haeuxliengz coglaeng, duzmoed cix youq gwnz ganj faex ciengq go guhcaemz. Duzmoed iq raen duzrwi iq youq gyang cumhva mbin bae mbin dauq aeu dangz, couh gienq de：“Vei, duzrwi iq, mwngz guhmaz ha? Nyaengq bae nyaengq dauq.” Duzrwi iq naeuz：“Gou cingq aeu dangz caepcawq haeuxliengz gvaq seiznit ha.” Duzmoed iq naeuz：“Guhmaz naemj baenzneix gyae ha! Lumj gou ciengq go baenzneix mbouj dwg gig soengsad lwi?” Duzrwi iq gienq de naeuz：“Mwngz lijdwg lumj gou nei gaenx guhhong ba, mboujnex seiznit, mwngz couh mbouj miz haeux gwn lo.” Duzrwi iq naeuz liux couh baenq gyaeuj laebdaeb bae aeu dangz lo. Duzmoed iq naemj： Bouxwnq cungj naeuz ci daengz baihnaj bya itdingh miz roen, daengz seiz caiq ra haeuxliengz hix mbouj nguh, haengjdingh mbouj dai iek. Yienghneix duzmoed iq couh laebdaeb youq gizhaenx guhcaemz lo.

Baihneix duzrwi iq aeu dangz gaiq suenva neix liux youh dingq duzrwi henzgyawj naeuz：“Con gvaq ndoengfaex baihnaj, caiq heux gvaq goengq bya ndeu, couh miz aen suenva hung ndeu, ndawde va gak cungj gak yiengh、 hoengzhoengz heuheu.” Yienghneix gyoengq duzrwi couh caez con gvaq ndoengfaex baihnaj, heux gvaq goengq bya ndeu, daeuj daengz ndaw suenva aeu dangz lo. Caj gyoengqde aeu dangz liux buen daengz ndaw rongz yo ndei le, youh hainduj gya na rongzrwi lo.

Yaepyet seiznit daengz lo, duzrwi iq gaenx youq ndaw rongz raeujrub, gwn dangzrwi ndeigwn. Dauqfanj duzmoed iq cix ra mbouj ndaej haeuxliengz, ra mbouj ndaej aen rongz hab youq, couh yienghneix mbouj gvaq geij ngoenz, duzmoed iq youh iek youh nit doeklaeng deng dai iek lo.(Couh Swjhan)