Gyajgeiz, gyoengqdou youq gwnz roen bae ranzlaux deng saek ci lo. Mwhhaenx heiqci hai ndaej menh raix- caix, couh lumj saehaexma raih. Mwngz aiq yaek naeuz lo, saek ci mbwq lai lo！ Hoeng, gou dauq mbouj naenghbaxbued.

Youq duenh roen daegbied saek ndeu, heiqci dingz roengzdaeuj lo, gou yawjraen song henz roen miz haujlai faex hung. Go faex maj miz dujva hoengz- hoengz heuheu, miz hoengz, miz henj, lijmiz maeq……Gou lij yawjraen mbangj go faexroz, daj gyae yawj bae, gyoengqde couh lumj geij duz mauhnyinz.

Riengzlaeng, gou yawjraen duz biengzbeih ndeu youq gyang cumhva mbinfefe. Yawj! Youq gwnz fwed gyaeu- ndei haenx lijmiz diuzraiz ndaem hau doxgek. Biengzbeih yaep ndeu mbin daengz gyang cumhva, yaep ndeu mbin haeuj ndaw ndoengfaex. Danghnaeuz gou hix ndaej mbin cwxcwx caihcaih, yienghhaenx haengjdingh yinx dangqmaz.

Sawqmwh, gwnz cuengci miz song duz nengzgengz. Gyoengqde maj miz doiq mumhgok raezranghrangh ndeu, aen’gyaeuj samgak, aenndang luenzgyaeq caeuq roek ga raezsaeq. Gyoengqde benz bae benz dauq mbouj dingz, lij seiz mbouj seiz dingz roengzdaeuj yungh ga roqroq bohliz, lumj naeuz：“Vaiq hawj gyoengq- dou haeujbae ba! Gyoengqdou hix naemj lumj gyoengqsou nei cwxcaih naengh youq gwnz daengq.” Ha, caen fangzhwnz!

Heiqci menhmenh hai baenaj, gou yawjraen baihrog cueng ci gak cungj gak yiengh gvaq henzgyawj gou. Aen ci hung saekhoengz cang rim huq ndeu dingz youq henzgyawj gou. Gou geqgeq, yawjraen de gawqyienz miz cibseiq aen loekci, caen dwg “iucing sipndangj” ndaw gyoengq ci ha!

Mwhneix, gou yawjraen miz aen ci gouqganq 120 saekhau ndeu “vu vi vu vi” hai gvaq diuzroen wngqgip. De baenzneix gaenjgip, haengjdingh dwg bae gouq vunzsieng roxnaeuz vunz baenz bingh.

Heiqci laebdaeb menhmenh hai baenaj, gou lij yawjraen aen ci geizheih dangqmaz ndeu——De daegbied raez, raez miz haj roek aen gyauzceh iq yienghhaenx. De lij sang raixcaix, sang miz sam aen gyauzceh iq yienghhaenx. Ceiq geizheih dwg, de lij doz cib geij aen gyauzceh iq.

Mwngz yawj, yienznaeuz gwnz roen saek ci lo, hoeng gou mbouj mbwq saek di, dauqfanj yawjraen haujlai yinxdaeuz.

(Ngeih nienzgaep Gu Gyahniz)