Ndawsim moix boux doengzhag raeuz, cungj miz aen dieg guh’angq he, de couh lumj fwed biengzbeih, vih raeuz bu ndei seiznyez hajsaek, dieg ndei guh’angq gou couhdwg diuz rijiq bakmbanj.

Haetromh, rumz ci daeuj, roeglwg ndiu lo, duzbya ndiu lo, dujva、go’nywj ndiu lo, gyoengqdou hix deng ci ndiu lo. Buet daengz henz rijiq, cijraen raemxrij sawdikdik, duzbya youq ndawraemx angqyangz diuq foux, lij seiz mbouj seiz diuq ok najraemx; duzroeg daj gwnz gyaeuj mbin gvaq eu fwen “cici”, vunz dingq le simsangj dangqmaz, henz rij nywj mwncupcup、heuswdswd, caen dwggyaez, gwnz dieg couh lumj daenj geu buhloeg he. Raq rumz ci daeuj, mbawfaex “sasa”, caeuq duzroeg itheij, gyonj baenz diuz go ndaw ndoeng ndei dingq raixcaix he.

Banringz, youq henz rijiq, couh dingqnyi sing saeg buhvaq “biba biba” caeuq sing riu haha gyoengq mehbaj, hix yawjraen lwgnyez youq ndaw- rij guh’angq, raemxrij lumj gaiq gingq nei, ingj ok mbwn lamz fwj hau, duzbya youq ndaw raemx youz, duzbit heuh “gaga” youq gwnz najraemx youz, rumz ci gvaq najraemx couh fubfabfab, ndei yawj dangq- maz.

Banringzgvaq, dou youq henz rij cuengq yiuh- rumz、dwkgeiz, dingq goenglaux、yahbuz gangj- goj……Mwh daengngoenz doek congh, fwjgyapbya saj roengzdaeuj, saj youq gwnz diegnywj, saj youq bouxvunz guhhong ndaw doengh, hix saj youq gwnz fajnaj gyoengqdou. Ninz youq gwnz diegnywj, ndei yawj dangqmaz, fwjgyapbya hawj gou simsoeng.

Banhaemh, boux vunz ndeu bae henz rijiq, ronghndwen hausagsag saj daengz gwnz najraemx, haujlai ndaundeiq baez yap baez yap, ciuq rongh le gwnz dieg, raq rumz ci daeuj, gwnz raemx myig- manzmanz, lupva mbinfefe doek roengzdaeuj, doek ndaw rijiq, fat ok raq dem raq homva.

Diuz rijiq bakmbanj dwg seiznyez dieg ndei guh’angq gou, de lumj dahsau miz fwed, daiq angqyangz dou mbin youq gwnz mbwn sang- ngaungau.

（Vujsenh Yen Dungzlingj Cin Sinhlungz Siujyoz seiq nienzgaep Danz Mingzsenh boux lauxsae son’gyauq Lungz Ging’yiz）