Binaengz ndwencaet, daemzngaeux mbanjranz miz gak cungj va’ngaeux hai hoengh, saekhau、 saeknding、 saekmaeq caeuq saekhenj……Mwh banhaet gij ndit saekgim daihdaeuz ciuq youq gwnz daemzngaeux, va’ngaeux engq hom lo, mbawngaeux hix engq heu lo.

Ndwencaet dwg mwh va’ngaeux hai ceiq hoengh, gyoengqde miz mbangj lijdwg valup, miz mbangj bemhbongz yaek hai, miz mbangj gaenq hai hoengh, loh ok simva saekhenjgim, sangreux gyaeundei. Sawqmwh, duz biengzbeih iq saeknding ndeu mbin gvaqdaeuj, caep youq gwnz valup soemsengseng haenx, couh lumj coenz sei Yangz Vanlij nei:“Go’ngaeux ngamq loh gyaeuj soemraeh, caeux miz biengzbeih caep baihgwnz.” Raq rumz baed gvaq, mbawngaeux youq gyang daemz loengzlaenh, couh lumj raemxlangh yawj mbouj daengz henz nei.

Fwn ndwencaet naeuz daengz couh daengz, gwnz mbwn doek fwnraq naed hung lumj naed duh nei. Gou buet daengz henz daemzngaeux, mbaet mbawngaeux ndeu dawz hwnj gwnz gyaeuj bae, ndoj youq laj aen “liengj iq” saekheu gwn rongzcehngaeux, yawjngonz fwn doek. Naed fwn doek youq gwnz mbawngaeux, danz ok hot go angqyangz ndeu……Hoengheiq ndei dangqmaz, ndawde miz di hom va’ngaeux, caen ndei nyouq ha!

Gou gyaez mbanjranz gou, engq gyaez va’ngaeux mbanjranz.

(Gveigangj Si Hozcwngz Siujyoz Cinz Linz)