Gyanghaet, gou caeuq duzciengh itheij bae ndaw ndoengfaex laux vat bauj.

Gou dawz fagcanj、heiqyouz、dajhojgih, gwih hwnj baihlaeng duzciengh, duzciengh cwxcaih dwk byaij bae coh ndoengfaex. Duzciengh seiz mbouj seiz yungh ndaengraez de mbaet makndoeng hawj gou gwn, gou gwn ndaej feihdauh dangqmaz, duzciengh hix gwn ndaej dungxraeng liux, aen dungx de bongzbwdbwd, haisim raixcaix ha!

Dou laebdaeb byaij, mbouj rox mbouj nyinh couh daeuj daengz daej aen gamj ndeu, duzciengh yungh ndaeng nyouqnyouq gwnzdieg naeuz:“Gizneix itdingh miz gim, raeuz vat ba.” Yienghneix dou couh hainduj vat lo. Duzciengh yungh ndaek gahung de lumj diuz saeu hung haenx baez daemh, gwnzdieg loemq roengz aen congh hung ndeu, aen congh miz bak mij laeg, gou hix yungh fagcanj vat namh. Sawqmwh ronghmyanmyan, raen miz ndaek gim ndeu, de beij duzciengh lij hungsang, aen bak gig hung, lwgda lumj aen dienhdaeng nei, gwnzgyaeuj lij miz gaeu, gwnz ndaeng maj miz oen, dwglau dangqmaz. De hujfwdfwd dwk naeuz:“Caen ndei lo! Aen dungx gou cingq iek, gou yaek gwn sou bae.”Gou caemdingh dwk dawz heiqyouz hawj de, naeuz:“Neix dwg gaiqgwn ceiq ndei gwn, ndoet song sam gaemz couh imq lo.” Doeklaeng duzgvaiqgim sikhaek ndoet gwn heiqyouz, gou couh heuh duzciengh dawz dajhojgih coemh heiqyouz, duzciengh diemj dawz dajhojgih vut coh duzgvaiqgim, duzgvaiqgim gwnz ndang deng feiz coemh lo, de youq gwnzdieg rouxringx, yaep ndeu de couh mbouj doengh saek di lo, gou caeuq duzciengh hix sikhaek dauqma ranz lo.

Ngoenzhaenx，gou caeuq duzciengh vat mbouj ndaej gijmaz bauj, dauq dwg bungq gvaq baez yung’yiemj ndeu, baezlaeng lij dwg lauxsaed youq ranz ba.

(Sanglinz Yen Dafungh Cin Cunghsinh Hagdangz seiq nienzgaep Cinz Cihsan boux lauxsae son’gyauq: Mungz Cwngzgen)