Haetromh, gaenjgip gwn haeuxhaet sat, gou yaek bae aen ban son suyoz boujhag goenggoq, caeuq daxmeh doxcaez roengz laeuz. Gou yawjraen ndaw daeh daxmeh miz aen liengj ndeu, gou ngiengx gyaeuj yawjyawj mbwn, ndit ronghsag, yienghneix, gou ngeizvaeg naeuz：Yi？Mbwn baenzneix gvengq, daxmeh vihmaz lij dawz liengj ne?

Gig vaiq, dou couh daengz aen ban son saw lo, daxmeh daiq gou bae roxnaj gyoengq lauxsae aen ban son saw gonq, yienzhaeuh gyau gou hawj Lij lauxsae couh lizhai lo. Boux Lij lauxsae neix yawj hwnjbae nienzgeij mbouj laux, byoem ndaemndat, fouq lwgda hunghwd、sawdikdik, yawj hwnjbae unqswnh dangqmaz. Mwh hwnjdangz, de cam dou gijmaz dwg gyaez ne? Ndaw gyausiz yaepyet nauhyied hwnjdaeuj lo, aen vwndiz neix gyoengq doengzhag cungj doxyaeng huhu. Hoeng gvaq liux faen cung ndeu、gvaq liux song faen cung……Cix mbouj miz vunz ndwn hwnjdaeuj hoizdap aen vwndiz neix.

Doeklaeng, Lij lauxsae lwnh dou, gyaez couh youq henz gyoengqdou, de ciengzseiz bienq yiengh, seizseiz youq henz gyoengqdou, de mizseiz dwg coenz vahdaengq genjdanh ndeu, mizseiz dwg mbat lumhlah unqswnh ndeu, mizseiz lijdwg gij mboendamz ndaw ndwenngoenz……

Dingq vah lauxsae liux, ndaw gyausiz sikhaek caemrwdrwd, ndawsim gou cungj dwg ngeizvaeg.

Couh yienghneix, aen singhgiz ndeu liux, ndaw uk gou lij seiz mbouj seiz naemj song aen vwndiz, aen daih’it couhdwg vihmaz daxmeh ngoenznaengz cungj dawz aen liengj ndeu ne？ Aen vwndiz daihngeih dwg gij gyaez henz gou dauqdaej dwg cungj lawz?

Ngoenz ndeu, daxmeh ciep gou dauq ranz byaij youq gwnz roen, dan dingqnyi geij sing “maenjrumrum”, mbwn doek fwn hung lo, mwh gou nyinhnaeuz yaek deng fwn rwed baenz gaeq doek raemx, daxmeh guhmuengz dawz liengj ndaw daeh okdaeuj, gang liengj. Dauq daengz ranz, gwnz ndang gou mbouj miz saek di raemxfwn, hoeng buenq mbaq daxmeh gaenq dumzcatcat. Sikhaek, gou rox lo, daxmeh itcig yungh gij fuengsik de laeglemx gyaez gou, gij gyaez de mbouj miz sing’yaem, cix seizseiz hopheux youq henz gou.

Gyaez, couh youq henz dou, seizseiz miz. Cigsoh daengz ngoenz ndeu, mwngz sawqmwh roxnaj, gij gyaez henz mwngz, dwg baenzhaenx hungmbwk!

(Sanhdungh Swngj Gauhcingh Yen Gauhcwngz Cin Fanzlinz Siujyoz Fanz Gyahyiz bouxhoiz: Cwz Fanghdingz)