Daj cienjhag gvaqdaeuj, gou bienq ndaej engqgya gagsaenq, engqgya mbeilaux lo, neix cungj dwg aenvih miz mwngz son’gyauq. Gou bungz daengz saeh mbouj swnhsim, mwngz cungj son gou. Mwngz son gou haujlai dauhleix caeuq sawmaeg, mwngz mbouj lau dwgrengz mbouj lau vunz ienq、guh haemz guh hoj, mwngz couh lumj daxmeh ityiengh ciuqgoq dou. Cwng lauxsae gingqgyaez, itloh miz mwngz, caen ndei!

Geiq ndaej miz baez ndeu, aenvih miz doengzhag an vamingz hawj gou, ndigah gou mbouj vuenheij saek di. Mwngz raen gou hwnjdangz mbouj miz simgei, roengzdangz cungj dwg nyapsaebsaeb. Rox gij yienzaen saehcingz le, mwngz heuh boux doengzhag haenx caeuq gou daengz henzgyawj, hainduj caeuq dou gangjgoj. Mwngz hawj dou gag naeuz gij ginggvaq saehcingz, hoeng neix dwg gij saeh you gou mbouj gamj gangj ok bak, gou mbouj gamj gangj. Mwh gou cingq yupyat, yawjraen mwngz cingq riu dwk yawj gou, gou miz mbei lo, gou mbeilaux aeu saehcingz daj gyaeuj daengz rieng gangj okdaeuj, hoeng lijdwg nyaenx mbouj ndaej daej lo. Mwngz dopdop mbaq gou, naihsim caeuq dou gangj hwnjdaeuj. Moix coenz vah mwngz cungj lumj ndik raemx ndeu nei, ndik youq gwnz song duj va oiqet neix. Dou nyaenx mbouj ndaej cungj daej hwnjdaeuj lo. Mwhneix, mwngz daj ndaw daeh aeu ok mbaw ceijgaen ngamq lw haenx, aeu de cek baenz song mbiengj, faen hawj song dou. Dou ciep aeu ceijgaen, couh lumj duzmeuz doeksat ngamq deng lumhlah ndei ityiengh, dou simsangj lai lo.

Baez yaep da, dou couh yaek siujyoz bizyez lo, yienznaeuz caeuq mwngz doxcaez seizgan mbouj raez, hoeng gij gvansim mwngz, gou itcig geiq youq ndawsim. Youq gizneix gou naemj doiq mwngz gangj: “Lauxsae, gyo’mbaiq mwngz!”

(Nanzningz Si Cauzyangzlu Siujyoz Linz Sinh- yenj boux lauxsae son’gyauq: Cwng Fanghlingz)