Ndwen 9 ngoenz 1, dou haihag ngoenz daih’it bi 2021 haggeiz seizcou, gou angqyangz daeujdaengz hagdangz, gvaq le ngoenz daih’it haggeiz moq. Ciuq lauxsae naeuz, haemhhaenx banhaemh 8 diemj, gou cinjseiz naengh youq baihnaj densigih, yawjngonz 《Haihag Goq Daih’it》.

《Haihag Goq Daih’it》 cingj haujlai vunz youqgaenj daeuj, lwnhgangj le aen dem aen gojgaeq hawj vunz gamjdoengh, ndawde hawj gou ceiq gamj- doengh dwg aen gojgaeq daengx ranz vunz Lah- cizniz. Gyoengqde daengx ranz geij daih vunz youq ndaw geij cib bi gvaqbae haenx, itcig guh gienh saehcingz doxdoengz ndeu, haenx couhdwg guh boux hoh bien’gyaiq. Youq mwh ngamq laebbaenz Cung- guek moq, Sinhgyangh Hungzgizlahfuj Benhfangz ngamq laebbaenz, swyenz vanzging yakrwix dangq- maz, deihseiq yung’yiemj dangqmaz, banlaux ranz gyoengqde Gaijlizdizbezgwz gag iugouz bae guh, vih gyoengq cansw hen bien’gyaiq daiq roen, de baez guh couh guh le 20 lai bi. Gaijlizdizbezgwz bi- ndwen laux le, couh gyau hong hawj daeglwg bonjfaenh Bahyihgaj, Bahyihgaj guh le 30 lai bi, doeklaeng hix aenvih ndang mbouj ndei gyau hong hawj le daeglwg bonjfaenh Lahcizniz. Bi 2021 ndwen 1 ngoenz 4, Lahcizniz vih gouq lwgnyez doek roengz ndaw conghnae dai bae lo, mwh gyoengq- vunz rag de hwnjdaeuj, song fwngz de lij dwg yiengh gingz lwgnyez ok gwnz najraemx. Seizneix, daeglwg 12 bi Lahcizniz hix laebceiq majhung le aeu lumj daxboh nei, guh boux hoh bien’gyaiq ndeu.

Dingq le aen gojgaeq gyoengqde, gou caeuq vunzranz cungj raemxda roengz. Gou nyaenx mbouj ndaej deng gij cingz gyaez guek naekna geij daih vunz daengx ranz Lahcizniz gamjdoengh, gyoengqde youq gij vanzging baenzhaenx ganhoj lij caenhrengz ceiq hung vih guekcoj caeuq beksingq ok rengz, roxnaj cingzgvang yung’yiemj raixcaix lijdwg mbouj goq bonjfaenh bae gouq vunz. Gyoengqde dwg gij yienghndei raeuz aeu hag, raeuz aeu daj iq laebceiq, hag ndei guh ndei, majhung le vih guekcoj guh ok faenh rengz bonjfaenh.

(Baksaek Si Yougyangh Gih Saedniemh Siujyoz Vangz Ginjgunh boux lauxsae son- gyauq: Luz Vei)