Ngoenz singhgiz ndeu, dou geij boux siujbaengzyoux youq laj laeuz gunghswh daxboh gou guhcaemz “duzfangz” gaemh vunz, gig ndei guhcaemz law!

Dou cai “geuz rin baengz” cai ok “duzfangz” gonq, doeklaeng dwg Cinz Siuj- mingz guh“duzfangz”. De sien geq 30 aen soq, dou gyoengqvunz sikhaek sanqdeuz lo. De geq 30 aen soq liux, couh gyaep coh Siujli liz de ceiq gyawj haenx, daraen yaek gyaep dawz lo, dou cungj vih Siujli gip dwk heuh:“Gyayouz! Gyayouz! Gyayouz!” Mbouj siengj daengz Siujli baez cienq ndang, buet deuz lo. Cinz Siujmingz gaemh mbouj ndaej, ca di laemx lo. Gyoengqdou riuhaha hwnjdaeuj. Cinz Siujmingz baez ndwn hwnjdaeuj, couh vax dawz Daegveij, Daegveij mbouj caengz fanjwngq gvaqdaeuj, couh deng guh“duz- fangz” lo, gyoengqdou youh riuhaha hwnj- daeuj.

Daegveij“duzfangz” neix hainduj gaemh vunz lo. De yawj gou vunz daemq youh iq, youh gyawj de, sikhaek buet coh gou vax gou, gou yamqdin couh buet, buet daengz henzndang Gogez hix guh mbat gip cienq ndang ndeu, de gaemh mbouj dawz gou，sikhaek bae gaemh Gogez, Gogez buet mbouj gib couh deng gaemh dawz lo. Gogez cij ndaej guh “duzfangz” lo.

“Cungj dwg mwngz haih gou guh ‘duzfangz’, gou aeu gaemh mwngz.” Yiengh- neix，Gogez couh buet coh gou, gou cienq ndang couh buet, buet ndaej gig vaiq, dujrwz gou dingqnyi sing rumz yiengjhuhu bae, daihgya cungj vih gou gyayouz, hoeng gou lijdwg buet mbouj gvaq de, gou deng gaemh lo, gou deng guh “duzfangz” lo.

Gou hainduj gaemh vunz lo, gou yawjraen liz gou ceiq gyawj dwg Siujgyangz, gou sikhaek buet bae gaemh de, de cienq ndang couh buet, laj din de lumj caij funghhojlunz nei gig vaiq, gou hix buet gig vaiq, daraen couh yaek gaemh dawz de lo, Siujgyangz sawqmwh baez cienq ndang naemj buet deuz, gou couh lanz youq baihnaj de, gaemh dawz de lo. Gou angq raixcaix.

Neix couhdwg guhcaemz “duzfangz” gaemh vunz, dou guhcaemz le geij diemjcung, gyoengqdou guhcaemz ndaej baeg dangqmaz, hoeng hix sim’angq dangqmaz.

(Sanglinz Yen Dafungh Cin Cungh- sinh Hagdangz seiq nienzgaep Cinz Cihsan boux lauxsae son’gyauq: Mungz Cwngzgen)