Bineix gyajseizndat, daxmeh daiq gou bae Byagenzlingzsanh youz. Caeux couh dingqnyi gizneix miz haujlai lingz, hoeng gou caeuq daxmeh itloh daengz dingjbya, hix mbouj raen ngaeuz lingz, cij doeknaiq coh dinbya byaij roengzbae.

Gou dawz bingz raemxyinjliu ndeu okdaeuj, cingq gwn dwk yinx dangqmaz, sawqmwh dingqnyi nyefaex yiengj “vava”.

“Va, vaiq yawj, lingz daeuj lo!” Duz lingz iq saekhenjgeq ndeu, da youh hung youh luenz, yiengh dwggyaez raixcaix, dan raen de riengjret diuq hwnj ganj faex, swnh vunz mbouj haeujsim youh diuq daengz ndaw gyoengqvunz bae, byaijndogndog depgaenh dou, mbouj lau saek di. De sawq lumhlumh bingz raemxyinjliu ndaw fwngz gou. Ngiengx gyaeuj yawj mbat ndeu, swnh gou mbouj haeujsim, gaemdawz bingz raemxyinjliu ndaetndaet bae. Gou hix gaemdawz aen bingz ndaetndaet bae, mbouj nyiengh.

Song dou cungj mbouj nyiengh. Lingz iq gingqyienz miz di mbouj naihfanz lo, swenj “au au” song sing, lumj cingq naeuz:“Vaiq hawj gou ba!” Gou sim baez unq couh cuengq fwngz lo, de angqyangz coh gou baet rieng. Lingz iq got dawz bingz raemxyinjliu, “vah” mbat ndeu diuq haeuj ndaw ndoengfaex bae.

Gou laihnaeuz de rox baenq fabingz, naemj mbouj daengz de got bingz henx daejbingz, gingqyienz henx ok aen congh iq ndeu, raemxyinjliu daj congh iq lae okdaeuj. Lingz iq ciep haeuj bak bae, ndoetgyatgyat. De doq ndoet doq singjgaeh yawj seiqhenz, lauheiq gij “doxgaiq hingz ndaej” bonjfaenh deng bouxwnq ciengj bae. Yiengh de caen lumj boux lwgnyez mbouj roxsoq nei, hawj vunz nyaenx riu mbouj ndaej.

Yienznaeuz deng lingz “dajgiep” lo, gou cix angqyangz dangqmaz. Mwh gou sij mbouj ndaej lizhai, lingz iq lij coh gou baet fwngz doxbiek!

（Gvangjdungh Swngj Sinhcin Si Bingzsanh Saedniemh Hagdangz Yenz Cinzyij）