Daxboh gou gyaez doeg saw, daxmeh mbangj seiz gangjriu naeuz daxboh dwg “bouxmaezsaw”, daxboh cungj dwg riunyumnyum naeuz：“Ndaw saw gag miz ranzgim, ndaw saw gag miz saulengj……” Gij goj daxboh maez doeg saw lai lo, couh naeuz gienh saeh ceiq gyawj ba!

Baezhaenx, daxboh ndaej cek saw moq de gyaez raixcaix ndeu, dan raen de fwngz gaem cek saw, angqyangz ndaej diuqyetyet, lumj boux lwgnyez vuenheij nei, ciep roengzdaeuj raen de naengh youq gwnz sahfaz, siujsim lili biengj saw le, yinxsubsub dwk yawj hwnjdaeuj. De yaep ndeu bwncaeuz nyaeuqnyat, bwncaeuz song mbiengj cungj yaek dep doxgyawj lo, lumjbaenz cingq naemj, youh lumj- baenz cingq you gijmaz; yaep ndeu youh riuhaha hwnjdaeuj, lumjbaenz gip ndaej gijmaz dijbauj; yaep ndeu youh gag nambetbet： Caeuq gou naemj doxlumj ha……Daxboh cungj lumz seiqhenz liux, gou gvaq henz de cungj mbouj rox.

Mwhneix, daxmeh cingq cawj haeux, de yaek ok rog bae cawx doxgaiq, couh doiq daxboh naeuz：“Bakcauq cingq cawj haeux, mwngz yawj di, gaej deng feiz maej rek lo!” “Ndei, ndei!” Daxboh gyaeuj hix mbouj ngiengx dapwngq naeuz. Gij saenzcingz de lumjnaeuz cingq dap vwndiz daxmeh, youh lumjnaeuz cingq caeuq vunz ndaw saw gangjgoj, daxmeh mbouj cuengqsim, youh daengq baez moq cij cuengqsim okbae. Daxmeh ngamq okbae, daxboh youh daj bakcauq naengh daengz gwnz sahfaz “henx” cek saw de lo. Seizgan faen ndeu miux ndeu gvaqbae lo, mwh daxmeh gipgip muengz- muengz gaex dou haeujdaeuj, ngamq daengz bakdou couh nyouq daengz raq heiq remj ndeu, “Mbouj ndei, rek remj lo!” Daxmeh sing sang hemq, sam yamq guh song yamq cung haeuj bakcauq bae, caen dahraix heiq remj couhdwg daj ndaw rek cienz okdaeuj, yawj, ndaw rek gaenq ndaemndatndat, ngaiz hix deng cawj ndaem liux, baezneix daxmeh caen heiqndat dangqmaz, mwh cingq naemj ndaq daxboh, cix raen daxboh lij roengzsim yawj saw, mbouj rox baenz saeh maz lo.

Mwngz yawj, neix couhdwg daxboh maez saw gou, de mboujdan guh ok gij yienghndei gyaez doeg saw hawj gou, caemhcaiq lij ciengzseiz lwnh gou gij neiyungz mizyinx ndaw saw, gou gyaez daxboh raixcaix, gou daengzcog hix yaek lumj de ityiengh guh boux maez saw iq ndeu, lai rox saw rox sa, yungh daengz ndaw ndwenngoenz bae.

(Giz Giz)