Gaxgonq miz godaengngoenz ndeu, de mbouj naemj daengx ngoenz humx aen daengngoenz cienq, de naemj gaij hangz, ngoenzngoenz doeng naemj sae naemj ngiengxgyaeuj couh ndaej raen ndaundeiq.

Hoeng, danghnaeuz de ngiengxgyaeuj, nyinz va de couh goenq lo.

Ngoenz neix banhaemh, godaengngoenz lumj aenbaez nei, naemj gij ronghgywg ndaundeiq, naemj gij laepyamj huzswnh gyangmbwn. Sawqmwh, roegyeyingh ma daengz henzgyawj de, roegyeyingh sing daemq naeuz:“Mwngz lumjbaenz yawj hwnjbae mbouj sim’angq.” Godaengngoenz ngaekngaek gyaeuj. Da roegyeyingh lumj yawj rox simgei vunz nei, godaengngoenz roxnyinh simgei bonjfaenh couh lumj diuz gaeu yawj mbouj raen nei, dwg yienghhaenx raezrangh, lumjnaeuz caeux couh deng roegyeyingh daraeh yawj rox lo.

Gyanghaemh caemrwdrwd, roegyeyingh youh cam：“Mwngz dwg mbouj dwg naemj yawj ndaundeiq?” Godaengngoenz geizheih ngaekngaek gyaeuj, mboujgvaq de mbouj caiq cam. Roegyeyingh angqyangz naeuz：“Neix guh ngaih, gou daiq mwngz mbin hwnj gyangmbwn bae！”

Gyoengqde yaek guh yezgigiuz, gyoengqde ra mbawfaex ndeu daeuj guh “lamz” yezgigiuz, youh ra mbaw baengz ndeu guh “gigiuz” yezgigiuz, gyoengqde lij ra diuz sihoj ndeu daeuj diemj feiz. Doeklaeng, roegyeyingh gamz di namh unqnyinh haeuj ndaw lamz bae, bang godaengngoenz haeuj lamz bae, diemjfeiz、hainduj mbin！ Yezgigiuz dauqdaej youq gyanghwnz mbin coh gyangmbwn, mbin coh gij ndaundeiq ronghsagsag haenx.

(Liengz Cojwj)