Youq mbanjranz gou, miz aen suenmak gvangqlangh ndeu. Ndaw suenmak ndaem miz haujlai gomak, miz gobizbaz、gobingzgoj、gomakgam daengj, lij miz haujlai go gou mbouj rox baenzlawz heuh mingz gyoengqde.

Seizcin daengz lo, va ndaw suenmak angj hai, ndingnding heuheu, doxbeij gyaeundei. Miz vadauz nding、valeiz hau、va byaekyouzcai henj, yinghdauz ndingfug，bizbaz henjrwd, aen’aen hunghwd venj youq gwnz go, hawj vunz myaiz rih.

Seizhah daengz lo, yawj! Naz gve mwncup haenx, aen dem aen gvehoengz luenzlulu ndoj youq laj mbaw, lumjbaenz miz di najmong. Lijmiz geij aen mbeihung caegcaeg loh gyaeuj okdaeuj, lumj maqmuengh bouxndaemgve vaiqdi daeuj mbaet nei.

Seizcou daengz lo, haenx dwg aen geiqciet dajsou. Makbingzgoj、mak- sigloux、makndae、makit, lijmiz makcauj cungj baenz lo, dou daengx ranz bae ndaw suenmak cimz moq. Gak cungj mak venj youq gwnz go, hawj vunz myaiz rihdanghdangh. Gou gwn imq le nyaenx mbouj ndaej deng gij gingjsaek baihnaj yinx bae, ndithaemh ciuq youq gwnz gomak, mak lumj daenj le geu buh saek- henjgim nei. Lijmiz duz roeg ndeu mbin daengz gwnz gomak, cungj mbouj goq gij mauhnyinz seiqhenz bouxndaemmak guh haenx. Haenx couhdwg yungh daeuj hwk roeg, gojnaengz de hix naemj cimz gij feih ndei neix ba.

Seizdoeng daengz lo, cou sou doeng yo. Nae roengz foenfoen, gomak bangj hwnj geu buhmoq saekhau, baenzhaenx seuqcingh、baenzhaenx hausak, couh lumj bawxmoq caj baehaq nei.

Gou ndiepgyaez mbanjranz gou, ndiepgyaez suenmak gyaeundei mbanjranz, daegbied ndiepgyaez gij va mwncup gomak seizcin, gvehoengz lailai seizhah, gij mak laisou seizcou caeuq bawxmoq gyaeundei bangj buhmoq seizdoeng.

(Yiz Ciyouj)