Ndit rongh ndei, mbwn seuqcingh, duzyiuh youq gwnz mbwn gvangqlangh neix gvaengx bae gvaengx dauq, lumj seizseiz caepcawq coemj roengzdaeuj nei. Ndwn youq henz rij, muenghyawj dieggyae, yawj raen benq dieg henjrwdrwd ndeu, lumj aen haijyangz saekgim nei, gvangqlangh dangqmaz. Daj gwnz gemh, daj ndaw doengh, daengz bakdou ranz bohlungz guhnaz, cungj dwg va byaekyouzcai ndeiyawj raixcaix. Gou nyaenx mbouj ndaej byaij haeuj ndaw doengh va bae. Benq vahaij lanz da gou, lumjbaenz gou couhdwg duj va byaekyouzcai ndeu, duzrwi youq gwnz ndang gou aeu dangz, gou yiedcingz dongx de.

Ganj va byaekyouzcai dwg saekheu, sohswdswd, lumj boux bingdawzneuz ityiengh. Limqva dwg saekhenj, lumj duz biengzbeih saekgim; simva lumj diuz dem diuz mumh saekhenj; vafaenj lumj aen dem aen bingzyw iq. Va byaekyouzcai baenz cien baenz fanh cingq doxdongx, sojmiz cungj dwg yienghhaenx huzndei. Va byaekyouzcai gig bingzciengz, de mbouj lumj vamauxdan yienghhaenx fouqgviq, mbouj lumj vasuijsenh yienghhaenx yienghndei, hix mbouj lumj vameizgveiq yiengh- haenx gyaeundei, hoeng gou gyaez de raixcaix, gyoengqde doxgiet rengzrwd. Doenghnaz couhdwg aen daizheiq gyoengqde, gyoengqde youq gizneix angq ciengq, raq rumz ndeu baed daeuj, gyoengqde couh diuqfoux hwnjdaeuj, lumj boux dem boux canghdiuqfoux youq ndaw rumz diuqfoux nei.

Gou hix gyaez gij cingsaenz va byaekyouzcai, gyoengqde lumj bang Leiz Fungh iq, limqva rozreuq le ndaej guh youz, hix ndaej hawj duzrwi aeu dangz, couh guh baenz dangzrwi, lij ndaej hawj vanzging bienq gyaeundei. Va byaekyouzcai cungj dwg caegcaeg okrengz, va byaekyouzcai geijlai fouzsei、 gyaeundei ha!

(Yiz Hauyenz)