Mboengqneix, daxmeh daengx ngoenz youq gwnz muengx senjleh gak cungj hongdawz feigyaeuj, lij cazyawj gij sibinz feigyaeuj, gou laihnaeuz daxmeh yaek hai bouqfeigyaeuj ne！Byawz rox, gingqyienz dwg baenzneix……

“Mwngz yawj, seizneix doxgaiq hwnjgyaq, fei aen gyaeuj ndeu cungj aeu 30 lai maenz, mboujyawx gou bang mwngz feigyaeuj, cienz byaej roengzdaeuj aeu hawj mwngz ndaej mbouj ndaej?” Daxmeh lumhlumh aen’gyaeuj gou, riunyumnyum naeuz.

Yienznaeuz ndawsim gou mbouj cingznyienh saekdi, hoeng hix mbouj gamj doi daxmeh, cijndei cengqgengz dapwngq. Hoeng daxmeh dauqdaej mbouj dwg cienmonz feigyaeuj ha, faggeuz youq ndaw fwngz bouxwnq yungh ndaej raeuzrwdrwd, daengz fwngz de lumj fagcuiz nei naekradrad, faggeuz seiz mbouj seiz nap byoem gou, daxmeh youh yungh rengz rag, in dwk gou raemxda cungj lae okdaeuj bae.

“A——” Gou in dwk nyaenx mbouj ndaej hemq hwnjdaeuj.

“Mbouj yungh faggeuz lo, lauheiq yungh aen feigyaeuj dienh ndei gvaq.” Daxmeh mboujeiqsei yawjyawj gou. Hoeng, de loengh le baenz byongh ngoenz, aen feigyaeuj dienh lumjbaenz mbouj dingq vah saekdi. Gou baez yawj cij yawjraen dwg aen feigyaeuj dienh mbouj miz dienh lo. Ae, daxmeh “ngunh” gou ha!

“Hawj mwngz riu lo!” Daxmeh riunyumnyum, ganjgip bae cungdienh.

Doeklaeng, daxmeh roengzrengz mbouj soeng, yiengh byoem moq gou dauqdaej fei ndaej baenz lo. Yienznaeuz gij ginggvaq feigyaeuj miz haujlai goj, hoeng mwh gou yawj aen gingq raen yiengh byoem moq, nyaenx mbouj ndaej haenh naeuz:“Yienznaeuz ginggvaq ‘dwgrengz’, hoeng doeklaeng lijdwg mbouj loek bw!”

Seizneix, daxmeh cingq baet byoem gwnz dieg haenx naj riunyumnyum, caemhcaiq naeuz：“Baezlaeng feigyaeuj, ginggvaq hix aeu bienq ndaej mbouj ‘dwgrengz’ lo!”

Mbouj lo, lijmiz baezlaeng dem ha!

（Huzbwz Swngj Vujhan Si Meizyen Siujyoz Vangz Swjyui）