Gyajseizndat, lauxsae baeuqcaeq aen yinvu ndeu——Hag guh gak cungj hong. Ngoenzneix daxmeh hawj gou hag cawj byaek, daxmeh couh youq henz son, daxmeh hawj gou guh lwggwz、makyungz ceuj yangzcoeng. Gou couh naemj sawqsawq ba, gou haeuj ranzdajcawj bae. Ngamq hainduj ronq byaek, gou ronq lwggwz gonq, aeu aen lwggwz hung cuengq gwnz heng, gou nyinhnaeuz wnggai mbouj yungh ronq baenzlai, dan aeu buenq aen couh ndaej lo, daxmeh ei gij naemjfap gou, hawj gou ronq baenz gaiq. Ngamq hainduj gou ronq ndaej miz di hung, hoeng geij baez le, gou ronq ndaej yied daeuj yied yinz, yaep ndeu couh cang buenz lo, ciep dwk aen makyungz caeuq buenq aen yangzcoeng hix ronq ndei lo.

Gou caepcawq ceuj byaek, hai feiz aeu aen rek cuengq gwnz feiz, caj raemx gyang rek hauq liux, cuengq di youz ndeu roengz rek bae gonq, caj youz ndat le, aeu byaek haxbaenh ronq ndei haenx cuengq roengz gyang rek bae, yienzhaeuh ceuj bae ceuj dauq, ciep dwk caiq gya song beuzgeng gyu, hag yiengh daxmeh, cix mbouj lumj saekdi, hoeng yaep ndeu, heiq rangfwtfwt, yawj hwnjbae henjrwd hawj vunz myaiz rih.

Mwh gou ceuj byaek, roxnyinh gij byaek neix gaenq gwn ndaej lo, naemj cimzcimz, hoeng daxmeh cungj naeuz caengz baenz, gou youh naemj daxmeh ceuj byaek cib geij bi lo, cijndei laebdaeb ceuj. Daxmeh lwnh gou, cuengq di raemx ndeu roengz rek bae, lij ndaej baujcwng byaek mbouj remj, gou naemj neix dwg aen banhfap ndei ndeu, ngoenzneix youh hag ndaej banhfap ndei lo! Yaep ndeu, daxmeh naeuz seizneix ndaep feiz bae gonq, yungh farek goemq rek, oemq byaek yaep ndeu, yaepyet gou couh caj mbouj ndaej daek byaek cang buenz lo! Gij byaek gou ceuj haenx daxboh daxmeh cungj haenhndei, baez ceuj byaek neix ceuj ndaej baenz, aeu laebdaeb roengzrengz, aeu byaek ceuj ndaej engq baenz gwn!

Doenggvaq baez daejniemh neix, gou rox lo: Cawj haeux, hix aeu gangj dinghsim, mbouj hawj gij saek baihrog caeuq heiq de yaeuh, lumj hagsib ityiengh, feiz hab le, cij suenq guh ndaej baenz!

(Meij Dusah)