“Baenzlawz baez bae song bi cungj mbouj miz di siusik dauq ne? Yanghgangj youh mbouj dwg Baekging Sanghaij, gek ndaej mbouj suenq gyae ha!” Ah Duj miz di ngeiz naeuz, doq yamq hwnj mbaeklae doq cam de, “meh mwngz niemh mwngz niemh baenz binghnaek bae, youq gwnz congz ninz le song ndwen lai, ai……”

“Deng lo, gou couhdwg daegdaengq daeuj gyo’mbaiq sou ne! Caeklaiq ranz sou bangfwngz……”

“Wnggai yienghde guh, mwngz youh mbouj youq ranz, caezgya cungj dwg vunz aen mbanj he ha!”

Mwhneix, gaenq byaij haeuj ndaw ding hung lo, dingdangz ndawde miz vunz baij daiz baij daengq, lwgnyez buet bae buet dauq. Yienznaeuz seiq daeglwg Cinz Dayenz cungj gaenq aeuyah lo, hoeng mbouj faen ranz, seiq ranz bajliuz youq aen ranz hung he, sam daih caemhyouq, gvaq ndaej doxndei doxhuz. Youq rog mbanj yawjraen mbwnrengx bienq ndaej fwzrikrik, hoeng, youq ndaw ranz Cinz Dayenz saekdi hix yawj mbouj ndaej ok. Gij va nywj ndaw batva ndaw gyanghongh hoenghhwd lumj gaxgonq, ndaw ding daiz eij caet saekhoengz lij dwg uet ndaej seuqcingh dangqmaz, mbouj raen saek naed faenx, lozyieng gwnz daiz biu gij heiqhom gofaexgeq. Lungz Byauh ing faggvak youq henz mbaeklae dou dingdangz, ngaemgyaeuj byaij haeuj ndaw ding bae.

Cinz Dayenz cit doengzien, riunyumnyum heuh Lungz Byauh naengh roengzdaeuj, doeklaeng cam de song bi neix gvaq ndaej baenzlawz yiengh, Lungz Byauh mbouj haeujsim han, lwgda de baenqletlet cim gyoengq mehmbwk byaij bae byaij dauq ndaw ranz Cinz Dayenz, de ngeix Siu Cuh wnggai rox de daeuj luba? Rox daengz ndaw ding daeuj doxraen ne?

(caengz sat)