Daxboh daxmeh hai ci daiq gou bae daengz aen suen byaek henz singz ndeu, gizneix youh gvangq youh gyaeundei, ndit ciuq go’byaek dox- caez majhung. Byaekhau hausag- sag, lwgmanh ndingfwdfwd, lwgfaeg bizbodbod, lwgbieng gwnz gyaeuj miz dujva iq ndeu……Yi, gaiq dieg gaeu mbaw mwnhoengh haenx dwg byaek gijmaz ha, gou lumjbaenz mbouj raen gvaq, hix mbouj gwn gvaq. Bohlungz guhnaz riu lwnh dou, gizhaenx dwg maenz, gyoengqde ndoj youq laj namh, gaeu mbaw baihgwnz dwg gij “cang” gyoengqde. Bohlungz lij naeuz：“Cingqngamj maenz baenz lo, gyoengqsou bae vat maenz ndaej.” Gyoengq doengzdoih dingq le, angq dwk diuq hwnjdaeuj.

Bohlungz ra ma fagliemz、fagluj、faggvak iq caeuq aenlamz, daiq dou bae vat maenz. De yungh fagliemz gvej gaeu mbaw maenz bae, yienz- haeuh yungh fagluj vat hai ndaek namh hung, maenz couh loh okdaeuj lo, caiq yungh faggvak iq menhmenh vat namh henz aen maenz, yaep ndeu couh vat aen maenz hung ndeu okdaeuj cuengq roengz aenlamz bae. Ndei lai lo, gou ganjgip hag vat maenz, hoeng fagluj miz di naek, namh hix geng lai, gou song fwngz gaem fagluj yungh rengz vat namh, gig mbouj yungzheih vat hai di, hoeng ndaw namh mbouj raen saek aen maenz. Maenz ndoj ndaej caen maenh, gou youh yungh faggvak iq laebdaeb vat roengzbae, cij raen aen maenz iq ndeu loh gyaeuj okdaeuj, gou cuengq faggvak roengzdaeuj yungh fwngz menhmenh gvat namh, caj aen maenz loh byongh aen le, gou song fwngz gaemdawz de, lumj lod lauxbaeg nei, aen maenz yaepyet couh deng gou lod okdaeuj lo, yawj gij cingzcik guhhong bonjfaenh, gou ndawsim diemzsubsub.

Gij maenz dou vat okdaeuj miz aen bizbodbod、raezrangrang, lij raez gvaq fajfwngz vunzhung; hix miz aen byombyangbyang、iqetet, dinj gvaq fajfwngz gou. Dou doq vat doq gangjgoj, gwnz ndang caeuq gwnz haiz cungj nem namh liux, ndaw reih maenz sing riu goksa.

Dauqma daengz ranz, daxmeh swiq maenz seuq, aeu haeuj ndaw gaujsiengh bae, yaep ndeu, ndaw ranz couh miz feih maenz rangfwtfwt. Maenz gangq baenz le, gou gwn aen hung ndeu, caen van raixcaix!

〔Baekging Si Cunghgvanh- cunh Daihsam Siujyoz Sam(12) Cunghdui Hoz Gwngjmingz〕