Seiziq dwg hot sei gyaeundei ndeu, seiziq dwg diuz go ndeidingq ndeu, seiziq lijdwg cek saw gojgaeq ndeiyawj ndeu.

Mwh gou seiq bi, ciengzseiz dingqnyi vunzhung naeuz：“Ndaem gve ndaej gve, ndaem duh ndaej duh.” Gou ceiq gyaez gwn dangzrwi lo, gou naemj：“Gyoengq rwi caen huk ha, cigsoh aeu dangzrwi ndaem roengz namh bae couh ndaej haujlai dangzrwi lo.” Yienghneix gou daj ndaw ranz aeu di dangzrwi he, youq ndaw batva vat aen congh ndeu, aeu dangzrwi baenz di baenz di cuengq haeujbae, caiq haem aen congh ndei, yienzhaeuh gou couh caj sou dangzrwi lo.

Aen singhgiz ndeu, song aen singhgiz, sam aen singhgiz gvaqbae lo, dangzrwi lijdwg caengz maj okdaeuj, gou gaenjgip lo, deq mbouj ndaej bae vat dangzrwi okdaeuj. “Ya! Dangzrwi, dangzrwi gou bae gizlawz lo? Dangzrwi guhlawz mbouj raen lo?” Gou daejnga’nga hwnjdaeuj： “Nga nga nga……Dangzrwi gou mbouj raen lo, mbouj raen lo……Nga nga nga……Byawz caeg gwn dangzrwi gou？” Mwh neix daxmeh gvaqdaeuj cam：“Lwg ha, mwngz guhlawz lo？” Gou ciengzsaeq lwnh daxmeh, daxmeh daej riu mbouj ndaej, doiq gou naeuz：“Lwg huk ha, dwg duzmoed gwn dangzrwi mwngz lo, caiqlij dangzrwi ndaem mbouj baenz go.” Daxmeh gangj liux gou cij rox.

Lij miz baez ndeu, daxmeh bonjlaiz caepcawq daiq gou bae daet byoem, hoeng de laemzseiz miz saeh okbae lo, seizgei ndei！ Gou ra ma faggeuz daet byoem caeuq aen roi ndeu, cang bonjfaenh dwg cangh- feigyaeuj, daet byoem hawj duzyou- baengz. Gou roi byoem duzyoubaengz roengzdaeuj gonq, yungh faggeuz daet byoem baihswix bae, caiq bae daet baihgvaz, doeklaeng raen song mbiengj daet ndaej mbouj caezcingj, gou youh daet bae daet dauq. Daet baihswix mbat ndeu, daet baihgvaz mbat ndeu, byoem duzyoubaengz yied daeuj yied noix, hoeng lijdwg daet ndaej mbouj ndei yawj. Doeklaeng mbouj siujsim, gyaeuj duzyoubaengz deng gou daet ndoq liux lo. Daxmeh dauqma raen gwnz dieg luenhlablab, youh raen gij “cozbinj” gou, ndaq gou donq ndeu.

Gou baez naemj daengz song gienh saeh huk seiziq guh haenx, couh riuhaha. Gyoengq baengzyoux, gyoengqsou miz maz saehyinx mbouj?（Dangz Yisenh）