Duzmoed iq Cunghcungh baez ndiu gvaqdaeuj, caepcawq bae ra haeuxgwn. De baez okdou, raen gofaex hung henzgyawj lij daemq gvaq de, Cunghcungh angq raixcaix, bienq hung dwg aen siengjmuengh de.

“Doxboh, daxmeh……” Cunghcungh swenj, aen rongzmoed cungj yaek deng gij sing neix saenqdaenh doemq lo. Gyoengq moed vuengmuengz buet ok bak- congh, raen gaiq ga hung gvaq gyoengqde bak lai boix, gyoengq moed ngiengx gyaeuj, cij rox dwg Cunghcungh. “Cunghcungh, Cunghcungh!” Daxboh daxmeh doeksat hemq, “mwngz guhlawz bienq hung lo?” Hoeng, Cungh- cungh gaenbonj dingq mbouj nyi. Yienghneix, geij fanh duzmoed caez hemq, Cunghcungh dingqnyi lo, ngaem gyaeuj roengzdaeuj：“Gou hix mbouj rox guhlawz bienq ndaej baenzneix hung.”

Duzmoed ndeu naeuz：“Raeuz hwnj gwnz ndang Cunghcungh bae guh- caemz ba.” “Ndei ha, ndei ha.” Caezgya cungj benz daengz gwnz ndang Cungh- cungh bae. Yaepyet gwnz ndang Cunghcungh nauhyied dangqmaz, mbangj duzmoed humx gyaeuj Cunghcungh buet; mbangj duzmoed youq angjfwngz Cungh- cungh diuq; mbangj duzmoed youq gwnz din doxdax, danghnaeuz byawz deng dik doek roengz gwnz dieg, byawz couh saw……Caezgya vuenheij dangqmaz! Cunghcungh baeg lo, naemj haeuj ndaw rongz bae ninz. Caezgya muengz lanz Cunghcungh：“Gaej haeujbae, mwngz hung lai lo, aen ranz haengjdingh deng mwngz at vaih.” Cunghcungh cij ndaej bae gwnz diegnywj ninz.

Ngoenz daihngeih haetromh, Cunghcungh singj lo, raen bonj- faenh youh bienq dauq yiengh- gaeuq lo, lumjbaenz ngoenzlwenz dwg guh fangzhwnz nei.

(Cuh Anh)