Ndaw gyajgeiz ngoenz ndeu, gou guh cozyez sat le, caepcawq bang ndaw ranz guh di hong. Guh maz baenz ne? Muengh yawj goengq bya baihnaj ranz, gou gag singjsag, deng lo, couh hwnj bya bae gip fwnz ba.

Naemj guh couh guh, gou caeuq daeggo vuenh ndei buhvaq caeuq haiz, raek ndei cax caeuq gyaw couh bae. Dou riengjret couh daeujdaengz gwnz bya lo, yawj, go’nywj haw reuqhenj nyoengqnywtnywt, yiengh de hawj vunz gyaez. Lijmiz haujlai nyefaex hawq lumj coh gou vad fwngz nei, heuh gou daiq gyoengqde dauq ranz, daeggo gaenq nyaengq hwnjdaeuj le, de gip nyefaex hawq hwnjdaeuj, baenz bog baenz bog cuengq ndei. Gou hix mbouj fug saw, gip gaiq ragfaex hawq gig hung ndeu cuengq roengz gyaw bae, leuxcih laebdaeb doq byaij doq gip. Sawqmwh, fwngz gou deng doxgaiq gijmaz coeg mbat ndeu, in raixcaix. Gou yawj, ok lwed lo, laxlawz dwg deng oen faexsamoeg coeg lo. Daeggo ganjgip gvaqdaeuj bang gou ciemz diuz oen okdaeuj, gvaq yaep ndeu, couh mbouj rox in lo. Gou laebdaeb gip fwnz, haemq vaiq gyaw hix cang rim lo.

Daeggo rap hwnj fwnz hawq hainduj roengz bya lo, gou hix caepcawq raek gyaw dauqma ranz. Hoeng mwh gou raek gyaw, cij rox guhlawz baenzneix naek ha, ceiq noix hix miz ngeihcib lai gaen, hoeng gou mbouj ndaej doeknaiq, haeb heuj haeb faenz raek gyaw byaij bae coh ranz. Gou gag youq ndawsim gik bonjfaenh：Genhciz couh ndaejhingz! Dauqdaej daengz ranz lo, gou cuengq gyaw roengzdaeuj, daengx ndang unqriegrieg naengh youq gwnz aendaengq, mboujgvaq ndawsim diemzsubsub.

Baez guh hong neix hawj gou roxyiuj vunzhung guh hong mbouj ngaih, baezlaeng gou aeu lai bang gyoengqde guh di saehmbaeu.

(Gyanghsuh Swngj Haijmwnz Ginghci Gisuz Gaihfaz Gih Siujyoz Cangh Cwnz)