Youq mwh gyajseiznit, daxboh cawx bonj saw ndeu hawj gou, mingz saw dwg《101 Aen Goj Majhung Hawj Lwgnyez Sai Engqgya Lig》

Moix laeq lwgnyez sai cungj maqmuengh swhgeij, youz laeq lwgnyez sai majhung baenz daegmbauq ak ndeu. Ndaw saw miz 101 aen goj majhung hawj raeuz yawj, vih gyoengq lwgnyez sai majhung gunghawj dungxcaiz, hawj gyoengq lwgnyez sai loqsiengj ndaej saedyienh! Lumjbaenz:《Sam Duz Moulwg》 ndaej hawj lwgnyez sai coeng- mingz miz geiqmaeuz. 《Bouxbingsik Iq》 son lwgnyez sai giengiengz miz dangrap. 《Bouxdajcaiz Maenh’ak》 son vunz maenh’ak. 《Moegngaeux Iq Geiznyangz Geiq》 son vunz simsienh lauxsaed. 《Duzmeuz Daenj Haizraez》hawj vunz vaiqlag. 《Vuengzlwg Sim’angq》 son vunz miz simgyaez,《Bouxdamengz Lumh Duzciengh》son vunz guhsaeh aeu rox caez, mbouj ndaej luenh gangj……Doengzseiz, moix aen gojgaeq gangj aen dauhleix ndeu, mizyinx youh mizyungh. Lumjbaenz: 《Duzsaeceij、Duzmui Caeuq Duznyaenma》 lwnh raeuz, aenvih leih’ik faenboiq, song mbiengj doxhoenx doxceng mbouj fug, bouxlawz hix mbouj nyiengh bouxlawz, doeklaeng hawj bouxwnq beg gip ndaej, swhgeij cix dwg “lamz go- ndoek daek raemx, beg nyaengq baez ndeu”. 《Bouxguhnaz Caeuq Duzngwz》son raeuz, Bouxyakrwix bonjsingq mbouj yungzheih gaijbienq. Couhsuenq mwngz doiq de gig ndei, hix gig nanz gaijbienq bonjsingq yakdoeg de, baez miz seizheiq, de lij dwg haih mwngz. 《Foujgim、Foujngaenz Caeuq Foujdiet》lwnh raeuz, cij miz boux lauxsaed、mbouj simdam, cij ndaej daengz gyoengqvunz bangcoh, boux simdam youh ganvad haenx, itdingh deng gyoengqvunz mieng.《Duzsaeceij Caeuq Duznou Bauqaen》son raeuz, gwnz biengz bienqvaq mbouj dingh, raeuz mbouj ndaej yawjsiuj bouxnyieg, bouxvunz caiq ak hix miz seiz gouz vunz……

Vah bouxlaux naeuz: “Lai doeg saw, mwh sij faenzcieng couh lumj miz saenzsien bang.” Gou caen maij bonj saw neix, baezlaeng gou lij aeu lai doeg saw, mboujduenh daj ndaw saw hag gijndei, daezsang dungxcaiz swhgeij, hawj gou daj laeq lwgnyez sai majhung baenz daegmbauq ak ndeu.

（Boux lauxsae son’gyauq Cinz Cinhdonz/覃珍团）