Gou dwg boux hagseng iq, dwg boux lwgnyez youq laj geiznding seizdaih moq majhung, yienznaeuz aen seizdaih Mauz daxgoeng gaenq liz raeuz bae gyae, doengh boux hungzginh gvaq diegnywj、bin byanae、song fanh haj cien leix cangzcwngh, raeuz cijndaej youq ndaw densi, roxnaeuz youq ndaw saw yawjraen, hoeng gij cingsaenz buekguh mbouj lau haemzhoj gyoengqde louz roengzdaeuj hawj raeuz haenx haengjdingh daih cienz daih.

Bi 1921, Cunghgoz Gungcanjdangj hungmbwk laebbaenz lo. Bineix, dwg laeb aendangj 100 hopbi, Cunghgoz Gungcanjdangj caeuq seizdaih caemh yamq, caeuq beksingq caemh mingh, hamj gvaq diuz dem diuz mienglaeg, aeundaej aen dem aen ndaejhingz ronghlwenq.

Bi’gyai gvaq cieng gaxgonq, fwt baenz ciengz binghraq sinhgvanh ndeu, aendangj hungmbwk raeuz sikhaek gietduenh, fung singz fung loh, gatduenh goekbingh cienzboq. Daengx guek gwnz laj caemh sim, mizmbangj yinhsoengq doxgaiq, mizmbangj baij doih canghyw, mizmbangj guh senhconz, mizmbangj haeuj ranz diucaz daenggeiq, mizmbangj youq bakdou siujgih hwnz ngoenz hen dou……Gyoengqde cungj dwg gungcanjdangjyenz caeuq senhcin fwnswj, gyoengqde anbaiz miz bouhloh, raeuz dauqdaej hoenxhingz binghraq dwglau haenx.

Ngamq hoenxhingz binghraq cij gvaq le 3 ndwen, Huzbwz youh miz raemxrongz hung, lijdwg gungcanjdangjyenz raeuz, hwnz ngoenz doxlwnz hen youq gwnz fai, giensouj youq gai hung roen iq hawsingz、lajmbanj, gyoengqde mbouj lau rumz hung fwn hung, youq laj fai baizcawz aen dem aen cingzgvang yungyiemj, baujmaenh le sengmingh beksingq caeuq cienzcaiz ancienz.

Miz gunnanz, gungcanjdangjyenz ciengxlwenx buet youq baihnaj, dwg gyoengqde mbouj lau haemz mbouj lau hoj cij miz ndwenngoenz vuenyungz seizneix raeuz, raeuz dwg lwgnyez seizdaih moq, aeu seizseiz dingq aendangj gangj、 gyo’mbaiq aendangj, riengz aendangj byaij. Neix mboujdan dwg cizcwz raeuz, hix dwg sawjmingh raeuz.

Raeuz aeu roengzrengz hagsib, daengzcog majhung guh bouxciepban habgek.

(Cinz Denhyez)