Gangj daengz lajmbanj gou sug raixcaix, ranz daxdaiq gou couh youq lajmbanj.

Doenghgo, daxdaiq caeuq ranznden de cungj ndaem di. Daxdaiq ndaem di haeuxyangz, moix daengz seizcou, baenz gaiq baenz gaiq boekfeiz youq ndaw doenghnaz yaprongh, rumz baez ci daeuj, doenghnaz bienqbaenz aen haij saekgim. Haujlai vunz- guhnaz lij gyaez youq ndaw naz ndaem doengh nywjhwzmwz ndeu, lwgnyez cungj gyaez youq gizhaenx rouxringx guhcaemz, nywjhwzmwz couh baenz riz baenz riz, lumj gij raemxlangh gwnz haij nei.

Duzma, duzma doj lajmbanj caeuq duzma ungjcungh ndaw singz mbouj doxdoengz. Duzma ungjcungh ndaw singz manz lai, yaep ndeu sik fandenz, yaep ndeu henx haizdaz, yaep ndeu youq ndaw ranz ok haex……Hoeng duzma doj lajmbanj, de raen bouxwnq couh raeuq, raen bouxcawj couh buet gvaqbae guhcaemz, gyanghwnz de youq gwnznamh gyoetradrad haenx ninz, hoeng de mbouj siengsim gvaq.

Duzgaeq, dwg duz dwggyaez iq lajmbanj, aenvih miz de, lajmbanj mizyinx haujlai. Mizmbangj lwgnyez manz daiq duzma iq bae gyaep duzgaeq cingq youq baihrog ra gwn haenx. Duz gaeqboux bingzseiz vifung haenx yawjraen duzma, couh lau dwk mbei dek bae, dopdop fwed buet haeuj rongzgaeq bae youq, mwh buet lij doek geij diuz bwngaeq, lwgnyez gip bwngaeq hwnjdaeuj, daiq duzma dauq ranz lo.

Gvaq cieng lo, lajmbanj engqgya hoenghhwd lo, diegdieg miz sing bauqva, aen bauqcungmbwn cuengq hwnj mbwn bae, youq gyangmbwn veh ok diuz sienq hau ndeu, sing bauqrengh yiengj “bembem” dwg aen gyong hung bimoq.

Lajmbanj doxhuz doxndei, dwg fuk veh gyaeundei ndeu.(Leiz Yij)