De, dwg yienghndei seizdaih moq lwgnyezrauh; de, dwg boux- vunz ndaej gyoengqvunz boiqfug mbouj yungh ngeiz; de, youq 2003 nienz ndwn okdaeuj, baenz boux cungjcijveih hoenx feihdenj. Mbouj loek, mwngz gojnaengz rox lo, de couhdwg——Daxgoeng Cungh Nanzsanh.

Singz Vujhan baenz binghraq sinhgvanh, 2020 nienz 1 nyied 23 hauh singz Vujhan deng fung, mbouj dwg bouxvunz daegbied mbouj ndaej haeuj ndaw singz bae. Daxgoeng Cungh Nanzsanh ciep ndaej gij dunghcih baihgwnz, couh gipmuengz swnhhwnz naengh dungceh bae singz Vuj- han. Moix baez gou yawjraen ndaw densi aen cingzgingj daxgoeng Cungh Nanzsanh betcib geij bi neix naengh youq gwnz liedci, aenvih hwnzngoenz guhhong mbouj ndaej yietnaiq, baeg lai, couh ing youq aen eij laepda yietnaiq haenx, gou sim’in raix- caix.

Hamj haeuj 2 nyied, bingh- raq engq haenq lo, daengx guek cib geij ik vunz, gyoengqvunz gak dieg dingq cwngfuj cijveih, youq ranz mbouj ok dou, gyoengqvunz vueng hwnjdaeuj liux. Seizhaenx daxgoeng Cungh Nanzsanh vih hawj gak dieg beksingq onjsim, couh gangj naeuz:“Gak boux beixnuengx, gou rox daengz, vunzlai seizneix gig vueng, hoeng sim vueng hix mbouj miz yungh, daihgya aeu saenq guekgya, saenq aendangj caeuq cwngfuj, geiq- maenh, guekgya dwg giengiengz baihlaeng! Raeuz aeu gaenx swiqfwngz, ndaw ranz ndaw rug aeu doeng rumz, ok dou cawx doxgaiq aeuyungh itdingh dawz goujcau.” Dingq le gij vah dax- goeng Cungh Nanzsanh, gou cuengqsim lo, caiq hix mbouj lau lo.

Aenvih gou youq ranz mbouj ok dou, ndigah haujlai nanz mbouj lienh ndangdaej lo. Miz baez ndeu, daxmeh hawj gou yawj aen sibinz daxgoeng Cungh Nanzsanh dwk lanzgiuz, ndaw sibinz dax- goeng Cungh Nanzsanh dwk lanz- giuz guh gak cungj dungcoz sug dangqmaz, enj daj laeng, daj byonghmbwn ciep giuz, daj giz gyae ndek sam faen, gak cungj dungcoz guh ndaej daengzdieg caez, gou yawj dwk da cungj mbouj yaep, gou engq boiqfug de lo. Siengj mbouj daengz daxgoeng Cungh Nanzsanh betcib geij bi lo, dwk lanzgiuz lij yienghneix ak. Doengzseiz, hix hawj gou miz aen naemjfap ndeu: Bouxvunz mbouj- guenj youq cungj cingzgvang lawz, lienh ndangdaej cungj doiq cihgeij mizleih.

Gvaq mboengq ndeu, bingh- raq menhmenh dingh roengzdaeuj lo, daxgoeng Cungh Nanzsanh riu lo. Daengx guek beksingq cungj haenh de, cungj gingqboiq de.

Youq ndawsim gou daxgoeng Cungh Nanzsanh dwg bouxvunz maenh’ak ndeu. Mwh de bungz gunnanz, de mbouj lau saekdi, mbouj vueng saekdi. Vunz laux sim mbouj laux, moix ngoenz genhciz lienh ndangdaej, dangq- naj binghraq dwg boux goenglaux mbouj hawj binghraq hoenx hingz ndeu, de dwg boux vunz maenh- ak hawj daengx guek beksingq ndaej ingbaengh, gou gingqboiq de.

Couhdwg youq ndaw aen gyajgiz neix gou roxnaj daxgoeng Cungh Nanzsanh lo, ndigah gou aeu miz lijsiengj, gou majhung le aeu guh boux canghyw ndeu, bae yawj bingh gouq vunz, caemh- caiq ndaej vih guekcoj guh saeh.

Daxgoeng Cungh Nanzsanh dwg yienghndei gou aeu hag, de couhdwg boux vunz gou ceiq gingqboiq ndeu.

(Boux lauxsae son’gyauq Cinz Hungzmeiz/指导老师 覃红梅)