“Raeuz dwg bouxciepban gungcanj cujyi, cienzswnj gij cienzdoengj miznaj gwzming senhbei, gyaez guekcoj, gyaez beksingq, hungzlingjginh hoengzfwd youq najaek mbinyag. Mbouj lau haemzhoj, mbouj lau vunzdig, haenqrengz hagsib, genhgez doxdaeuq, coh ndaejhingz mbeilaux baenaj……” Moix baez ciengq souj go neix cungj siengj daengz Cunghgoz Gungcanjdangj raeuz. Aendangj, cihsaw baenzneix saenzswngq, baenzneix hungmbwk youh mbouj ndaej famh ndeu!

Cunghgoz Gungcanjdangj daj aen biengz gaeuq laepyam byaij daeuj, itloh swnh rumz buq langh, raemj gaeu beuj oen, byaij coh ngoenzneix fouqgiengz ronghsag, gwnz diuz roen neix miz haujlai gumzgamx, Cunghgoz Gungcanjdangj aeu gunnanz bienq baenz gij rengz baenaj, haenqrengz buekguh, mbouj lau haemzhoj. Dauqngeix bi haenx, Cunghgoz Gungcanjdangj dwkbyoengq le aen sevei funghgen, hoenx baih le bouxciemq Yizbwnj, hoenx baih le gozminzdangj……Naemj daengz doenghgij neix, gou sim gag gingqeiq Cunghgoz Gungcanjdangj.

Vahsug naeuz “daj ciuhgeq daengz seizneix, haujlai yinghyungz daj iq couh guh ok cingzcik hung”, dauqyawj diuz dah raezrangh lizsij, gwnz gwzming lizsij Cunghvaz Minzcuz raeuz, okyienh le haujlai boux yinghyungz lwgnyez maenh’ak. Liuz Huzlanz 15 bi youq laj bakcax vunzdig mbouj lau saekdi, Mauz cujsiz daezsaw hawj de gvaq：“Lix ndaej hungmbwk, dai ndaej miznaj.” Vangz Wsiuj ngamq ndaej 13 bi vih vunzlai, daiq vunzdig haeuj ndaw giendeqhoenx Bazluginh bae, bonjfaenh cix deng gaj dai lo. Doenghgij yinghyungz lwgnyez mbouj goq dai lix neix, caemhcaiq deng gaj vut diuzmingh oiqet, cungj cingsaenz gyaezguek cujyi caeuq heiqcingq minzcuz gyoengqde, ciengxlwenx dij ndaej raeuz hagsib. Gyoengqde yienznaeuz dai bae lo, hoeng, gyoengqde ciengxlwenx lix youq ndaw sim gyoengqvunz.

Seizneix, aendangj henhoh raeuz gvaq ndwen- ngoenz, an’onj dangqmaz, ndwenngoenz gvaq ndaej ndei. Dangguh boux hagseng iq ndaej daengz aendangj gungganq majhung, raeuz aeu daj iq hag rox cingqdeng bae yawj aenbiengz、ciuhvunz, gyaez aendangj, genhgez yungjhu aendangj lingjdauj. Daj seizneix hainduj, raeuz aeu roengzrengz rox saw rox saeh, seizseiz caepcawq ndei miz ngoenz ndeu bauqyauq guekcoj bauqyauq aendangj.

Vih saenqhwng Cunghvaz Minzcuz bae doegsaw. Gij vah Couh Wnhlaiz cungjlij youq henz rwz haplangh, roengzrengz doegsaw ba, aeu aen guekcoj raeuz hwnjguh engqgya gyaeundei bae, hawj aen Cungguek fouqgiengz、minzcuj、vwnzmingz ndeu, youq 21 sigij aen nienzdaih moqsag neix youq seiqgyaiq baihnaj daengjsohsoh.

(Cangh Dunghlingz)