Haha, gou gingqyienz bungzdaengz saeh ndei, daj gwnzmbwn doek roengz bingzdeih daeuj——Ndaej caeuq saenzbit Maxliengz gvaq ngoenz ndeu.

“Dinglingling……” Raq sing nauhcung gaenjlulu yiengj hwnjdaeuj, gou biengj hai fandenz hwnqdaeuj, vaiqvet cat heuj, swiq naj……Aiya, gwn haeuxcaeux ganj mbouj gib lo, lij miz 10 faen cung couh hwnjdangz lo! Haha, mbouj youqgaenj! Ngoenzneix gou ndaej caeuq saenzbit Maxliengz guhdoih, gou cingj de bang! Mbouj yungh gangj, Maxliengz han vaiq lai lo. “Sasa” vangraeh geij mbat saenzbit, boi cijvaiz caeuq daeh siuj- loengzbau ndeu couh youq ndaw fwngz gou lo. Ndei lai lo, gou mbouj deng dungx iek bae hwnjdangz lo! Mwh gou aemq daehsaw yaek bae hagdangz, Maxliengz hai bak gangj vah lo: “Mwngz caj yaep he!” Gangj dwk youh vad geij mbat saenzbit, gyaq ci dap hagseng ndeu couh youq baihnaj ranz gou, hehe, daih ndei lo! Gou diuq hwnj ci bae, vadvad fwngz coh Maxliengz, swhgih baez caij youzmonz, gyaqci lumj mbin nei hai coh hagdangz……

Banhaemh cuengqhag ma daengz ranz, gou dongx Maxliengz sing ndeu, couh haeuj ndaw rug bae sij cozyez lo. Ai, neix couh dwg aenmingh dang hagseng, moix ngoenz cungj miz cozyez sij mbouj sat! Ngoenzneix lauxsae louz cozyez engq lai, fwngz gou sij ndaej naiq liux. Deng lo, mbouj dwg miz saenzbit Maxliengz ma? Gou caiq gouzgouz de, ciq saenzbit de yunghyungh. Baezneix, Maxliengz mbouj nyienh geijlai lo, nyaeuq bwnda heuh gou gag sij. Hoeng, dingj mbouj ndaej vahgvai gou, doeklaeng dapwngq ciq hawj gou baez ndeu, mbouj miz baez ngeih. Gou ndaej yiengh dijbauj neix le, angqvauvau “sasa” foux hwnjdaeuj. Yijvwnz、suyoz、Yingh- yij……Sojmiz cozyez cungj guh sat lo. Caen ndei ha, gou caen siengj song fwngz bungj fajnaj Maxliengz hwnjdaeuj cup mbat ndeu. Mbouj miz cozyez lo, gou couh ndaej ndeindei bae guhcaemz lo, ye!

Hoeng, ngoenz daihngeih gyau cozyez seiz, gou cix mbouj riu ndaej okdaeuj, gwnz cozyez gingqyienz hoengqhathat, henz gok sij miz hangz cih ndeu: Saenzbit mbouj hawj boux lwgnyez dam guhcaemz yungh!

(bouxlauxsae son’gyauq Veiz Gyangh- bingz/指导老师 韦江萍）