Ranz gou ciengx miz geij duzrug, yienghde dwggyaez lai lo. Daengx ndang ndaemndwt, song mbiengj aen’gyaeuj luenzlulu de, miz song ceh da iq lumj lwgraz nei, diuzrieng raezrangh, youq giz gyae yawj, gyoengqde caen lumj aen douhau gwnz saw yijvwnz.

Duzrug ceiq maij gwn mienhbau soiq caeuq gijgwn duzbya. Moix baez gou dawz ok gijgwn duzbya, baenz naed baenz naed vanq youq gwnz raemx, gyoengqde yawjraen gijgwn ndeigwn le, couh ceng gonq lau laeng gvaqdaeuj ciengj gwn. Miz duz ciengj mbouj ndaej gwn, couh youq najraemx youz bae youz dauq, aenbak mbat hai mbat haep, lumj dwg naeuz: “Bouxcawj ngoenzneix hawj gijgwn caen noix ha!” Mwhde, gou couh laebdaeb vanq gijgwn hawj gyoengqde.

Duzrug miz seiz hix doxcaez guhcaemz. Geij duzrug doxcaez ndoj youq raeb rin iq, lingh duz youz bae youz dauq, yawj naj yawj laeng, lumj guhcaemz doxndoj nei. Miz seiz, gyoengqde doxcaez guhdoih youq henz gangbya youz gien youh gien, lumj geij boux baengzyoux ndei caez youzbyaij nei.

Menhmenh dwk, duzrug maj ok galaeng, caiq maj ok ganaj, diuzrieng menhmenh mbouj raen lo. Seizde, gou couh dawz gyoengqde cuengq roengz naz bae. Caj gyoengqde bienqbaenz duzgoep, couh ndaej bae gaeb nonhaih, henhoh haeuxnaz lo.

(Gyanghsuh Swngj Suhcouh Si Gauhsinhgih Swhsanh Sizyen Siujyoz Cwngh Gaihhinh)