Daxboh daxmeh caeuq daxbuz gou cungj dwg Cungguek Gungcanj- dangj dangjyenz. Gou lij ndaej geiq, gij yiengh angqfaengz mwh daxmeh daj yawhbwh dangjyenz cienjcingq haenx. De vihmaz baenzneix angq ne? Gijneix sawj gou siengj bae damqcaz “aendangj” dauqdaej dwg gijmaz?

Mwh gou cam gyoengqde “aendangj” dwg gijmaz, gyoengqde gangj le haujlai gojgaeq gvendaengz aendangj hawj gou dingq. Daj aenruz Namzhuz、“yieplau saekhau”、 Nanz- cangh Gijyi, gangj daengz hungzginz cangzcwngh、dingjhoenx Yizbwnj、gaijfang cancwngh, daj Cunghvaz Yinzminz Gunghozgoz laebbaenz ngoenzhaenx, itcig gangj daengz gaijgwz hailangh, Sinzcouh mbin hwnj mbwn、“Cangzngoz” hwnj yezgiuz. Gou yienznaeuz mbouj rox caez, hoeng gaenq laeglwd roxyiuj: Diegvih aendangj youq ndawsim gyoengqde gig youqgaenj, hix hawj gou roxnyinh aendangj hungmbwk. Gyoengqde lij aeu seiziq daxgoeng daxbuz, seiziq daxboh daxmeh caeuq seiziq gou guh doxbeij, engq sawj gou roxnyinh daengz, miz ndit caeuq fwn aendangj ganqciengx, gou dwg geijlai vuenyungz ha!

Hwnj siujyoz baenz boux sausenh duiyenz le, gou gingciengz yawj gij swhliu hagsib caeuq dangjcangh daxmeh, doengh gijneix sawj gou doiq aendangj roxyiuj yied daeuj yied laeg. Caemhcaiq, gou lij liujgaij daengz, Cungguek gawjbanh Baekging Au- yinvei、Sanghaij Sibozvei、Gvangjcouh Yayinvei daengjdaengj, cungj dwg aendangj raeuz vih guekgya fouq- giengz, minzcuz fukhwng soj roengz- rengz guh haenx. Daj ndaw sinhvwnz yawjdaengz, youq Vwnconh、Yizsu dicin caeuq raemxrongz nae hung daengj caihaih hung fatseng seiz, dangjyenz cungj dwg boux daih’it daengz yienhciengz, cungj dwg hawj vunz maqmuengh ndaej lix roengzbae! Seizneix miz aendangj lingjdauj, raeuz youh dwk hingz le ciengz ciengq binghraq bwtnaeuh. Neix couh dwg aendangj raeuz, aendangj hungmbwk youq ndawsim yinzminz!

Aendangj youq ndawsim gou, gou gyaez aendangj, dingq vah aendangj, nyinhcaen hag gohyoz cihsiz, majhung le, gou itdingh yungh hengzdoengh saedsaed caihcaih, lumj gyoengqde ityiengh baenz boux gungcanjdangj dangjyenz miznaj ndeu!

(Vuz Mingz)