4

Daxbuz cingq youq henz saeuq nyaengq dwk, yawjraen Siujvwnz daj ndaw rug byaij okdaeuj.

“Daxbuz, bae hag yaek daengzceiz lo, mwngz baenzlawz mbouj heuh gou hwnqdaeuj ne!” Siujvwnz dawz aen daehsaw venj gwnz ciengz haenx roengzdaeuj, aeu sujbaq rubrab uet naj mbat ndeu, couh yaek bae hag.

“Gwn caeux le caiq bae hag ba, ceiz di ndeu mbouj youqgaenj law.” Daxbuz ganjgip daek vanj haeux ndeu hawj Siujvwnz.

“Mbouj ndaej daengzceiz bw, daxbuz, mwngz geiq ndaej rwed raemx hawj goyizcienz bw, gou bae hag lo.” Siujvwnz aemq aen daehsaw, buet ok ranz bae.

Siujvwnz daj hagdangz dauqma, lumj bingzciengz nei, ma ranz gienh saeh daih’it, couh dwg yawj goyizcienz. De heux goyizcienz gien ndeu, lumhlumh ganjfaex, habhoz dwk haeuj ranz lo.

“Mwngz caen yawjraen go faex haenx ha?” Daxbuz ndenq boi raemx ndeu hawj Siujvwnz, laeglemx cam de.

“Yawj ndaej raen ha, goyizcienz hung youh ok nyod moq lo.” Siujvwnz naeuz, youh yawjyawj goyizcienz ndawhongh, aennaj vuenheij raixcaix.

Daxbuz yawj dwk Siujvwnz, sim geuj baenz ndaek ndeu.

(Gyah Yingj) （5）