Vahsug gangj: Sam bak roekcib hangz, hangzhangz ok cangyenz. Raeuz moix boux vunz cungj miz dinfwngz swhgeij, lumj diuqfoux、ciengqgo、vehveh、raedceij、daj- cawj…… Dinfwngz caixhangz gou dwg senj makgam.

Mwngz itdingh gig geizheih vih gijmaz dinfwngz caixhangz gou dwg senj makgam? Youh dwg baenzlawz lienh baenz? Gizsaed mbouj muenz mwngz gangj, gou couhdwg vihliux daxbuz gou cij lienh baenz dinfwngz caixhangz genj makgam. Aenvih daxbuz gou gwn mbouj ndaej soemj, moix baez daxmeh cawx makgam maranz, makgam soemj lai, daxbuz cungj mbouj gamj gwn, gou raen daengz yienghneix, gig sim’in daxbuz. Ndigah gou couh siengj baenzlawz senj makgam cij van ne? Gou hainduj yenzgiu, gou hwnj muengx bae caz swhliu mizgven gonq, caiq giethab bingzseiz cazyawj, ndaej- daengz yienghceij makgam van caeuq makgam soemj mboujdoengz, seizgan nanz le, gou couh rox baenzlawz senj makgam van lo.

Gou dauqdaej miz gihvei daeuj cingqsaed dinfwngz caixhangz senj makgam gou lo. Ngoenzhaenx ngoenz- singhgiz, gou caeuq daxmeh bae haw, vunz gwnz haw baebae dauqdauq, gou riengz daxmeh byaij haeuj ndaw haw bae, ndaw haw doxgaiq lai raixcaix, yawj ndaej gou dava liux. Gou yawjraen baihnaj miz dan gai mak, gou angqvauvau, sikhaek rag fwngz daxmeh byaij gvaqbae. Daeujdaengz dan gai makgam, daxmeh maeuq roengzdaeuj yaek senj makgam, gou doiq daxmeh naeuz:“Daxmeh, hawj gou daeuj senj, gou rox senj bw.” Daxmeh riu dwk naeuz: “Ndei, ndei, ndei, hawj mwngz senj, hawj mwngz senj.” Gou senj aeu aen makgam cungdaengj, naeng raeuz mbouj miz diemjraiz, mbouj geng hix mbouj naemz, hangxmak luenzlulu, gou saenqsim cib cuk doiq daxmeh naeuz: “Daxmeh, aen neix dwg aen van.”Daxmeh riunyumj doiq gou naeuz:“Daeglwg ha, mwngz nyinhnaeuz van couh cuengq roengz ndaw daeh bae ba.” Dingq daxmeh baenzneix gangj, gou engq miz saenqsim lo. Gou gaemdawz aen makgam naeng ndongqlik genggwk ndeu hwnjdaeuj, yawjraen aen makgam hangxmak mbouj luenz, couh cuengq roengz- daeuj, lauxbanj yawjraen le ngeizvaeg cam gou naeuz: “Siujbaengzyoux, aen makgam neix gyaeundei raixcaix, mwngz vih gijmaz mbouj aeu ha?” Gou riu dwk doiq lauxbanj naeuz: “Lauxbanj, mwngz mbouj rox, mwngz mbouj rox, mwngz aeu daeuj gwn couh rox lo.” Lauxbanj dingqnyi gou yienghneix gangj, couh mbiq aen makgam neix daeuj gwn, cij raen de naj mbwngmbwt, bwnda nyouq doiq gou naeuz:“Siujbaengzyoux, mwngz baenzlawz rox aen makgam neix soemj?”Gou itit ngeihngeih daekeiq dwk lwnh lauxbanj goj senj makgam gou. Lauxbanj dingq le yaengx lwg- fwngzmeh doiq gou naeuz:“Siuj- baengzyoux, mwngz caen ak, gou boiqfug mwngz!” Gou daekeiq dwk doiq lauxbanj naeuz:“Docih mwngz haenh gou.”Gou senj ndaej daeh rim le cij hawj lauxbanj caengh. Daxmeh hawj ngaenz le, gou caeuq daxmeh couh angqvau maranz lo.

Ma daengz ranz, gou heuh daengx ranz vunz daeuj gwn makgam, gyoengqde cungj haenh naeuz:“Mak- gam van raixcaix, caen ndeigwn.”Daxbuz itmienh gwn itmienh lumh gyaeuj gou naeuz: “Lan ha, mwngz caen coengmingz, mwngz senj daeh makgam neix caen van, gou gwn ndaej gig feihdauh.” Dingq daxbuz yiengh- neix gangj, ndawsim gou gig angq, youh daekeiq fwngfwng lwnh baenz- lawz senj makgam van hawj daihgya nyi.

Neix couh dwg dinfwngz caix- hangz gou—— senj makgam.

(boux lauxsae son’gyauq Cinz Hungzmeiz)