(ciep geiz 3472)

Daihcibngeih Aulungzgveiz Gangj Goj (Daihhaj)

Lungz Byauh dawz di ngaenz gag bae Yanghgangj lo.

Daengz Yanghgangj le, byongh bi gaxgonq de caen dwg gwn haemzhoj ndwi, gij cienz dawz daeuj sai sat lo, mboujdan gij baksieng caengz ndaej yw ndei, lienz giz diegyouq guding ndeu hix cungj mbouj miz. De dojdatdat caemhcaiq hukhathat, boux vunzmbanj mbouj raen gvaq maz seiqmienh, sawqmwh daeuj daengz aen singz nauhyied hoenghhwd he, de baenzlawz hab’wngq ndaej ne?

Miz geij baez de cungj siengj suenq lo, dauqranz caeuq daxmeh de gvaq gij saedceij andingh genjdan. Hoeng baez siengj daengz gij vah mwh yaek byaij dak Buzsimjsam lwnh hawj Siu Cuh, de couh mbouj miz mbei maranz. Gij vah dwg de gag gangj ok bak hane, seizneix mbouj miz yiengh he guh ndaej daengz, de miz maz naj dauq mbanjranz?

Yienghneix, de laebdaeb dingj roengzbae.

Caeklaiq, youq buenq bi laeng de ra ndaej faenh hong he: Bang aen ngaenzhangz guh gingjvei, de ndang cangq mbaq gvangq, daenj buhcifuz, dawz cungqraez, ndwn youq bakdou hung lij miz di yienghceij bw. Dauqdaej sam donq haeux ndaej gwn imq lo, moix ngoenz soujsauq, haghag uet cungq dwk nyingz, caiq dawz saekdi ngaenz bae cawx gij yw dwk baksieng, dauq hix gvaq ndaej roengz lo.(caengz sat)