Siz cungjsuhgi Gvangjsih daeuj,

Haeuj mbanj haeuj cangj haeuj minzboz;

Fazcanj fuengyiengq gangj mingzgoz,

Gyoengqraeuz dungcoz aeu riengz ndaej.

Hengzguh cwngcwz dangjcunghyangh,

Saedguh dandang onj hwnjbae;

Minzcuz fazcanj cizlieng ndei,

Benhgyangh sevei ndaej onjdingh.

Sien daengz Gveilinz caiq Liujcouh,

Cenzcouh geiqniemh gyoengq senhlez;

Sienghgyangh Canyiz dwk gizlez,

Lwgminz vuenyungz de cij haengj.

Yunghrengz coih ndei bya dem raemx,

Suhgi caemh cunz daengz maxdaeuz;

Cauxguh seiqgyaiq singz lijyouz,

Bouxboux lwnhnaeuz bya dah lengj.

Faenj raeuz Gvangjsih ndei guhdaeuz,

Suhgi goj naeuz faenj neix feih;

Yienghyiengh fazcanj lumj Liujveih,

Naek youq goekdaej guh cizlieng.

Daeuj daengz Namzningz cunz minzboz,

Giengzdiuh cenzgoz sifangih;

Yawj ranz yawj gyong yawj gohhih,

Doengzcaez fazcanj cij hwngvuengh.

Gyoengqraeuz geiq maenh suhgi gangj,

Vih minz vih dangj vid gen guh;

Gensez Gvangjsih hwnjhuhu,

Lublab lujlaj couh mbouj ndaej.