Saedceij mbouj bingzfanz, mbouj lumz simnduj. Bi 2021 dwg Cungguek Gungcanjdangj laebbaenz 100 hopbi, laeb dangj bak bi, dwg gij lizsij vih minzcuz duzliz、vih yinzminz gaijfang buekguh mbouj soengheiq, dwg gij lizsij vih guek- gya fanzyungz fouqgiengz、yinzminz fouqmiz haenqrengz hai roen. Bak bi ngamq nienz oiq rengz hoengh, youq aen cwngci daizheiq Cungguek caeuq seiqgyaiq, sij ok cekcek saw ronghsag gyaeundei, veh ok fukfuk dozveh Cungguek ceiq gyaeundei daeuj.

Siz Ginbingz cungjsuhgi youq gwnz hoih hung biujcangh caeuq cungjgez daengx guek duetgungz banghoj yiemzrwd senhgau, ginggvaq daengx dangj daengx guek gak cuz yinzminz roengzrengz, youq mwh youqgaenj ciepcoux Cungguek Gungcanjdangj laebbaenz bak hopbi, ndaej dwk hingz ciengz ciengq haenqrengz duetgungz banghoj raeuz. Seizneix daengx guek gaenq cienzbouh duet gungz, gij yienh gungzhoj duet mauhgungz caez.

Ndwn youq gwnz dieg Cung- guek, itloh byaij bae funghgingj gyaeundei dangqmaz, gij gingj engq gyaeundei youq baihnaj. Fukfuk veh ceiq gyaeundei Cungguek lai cungj lai yiengh, mboujdan dwg miz raemx loeg bya heu ndwi, miz lwgmanh hoengzswgswg, miz mbaw- caz oiqsumsum, vanzlij miz makgam henjrwgrwg, caemhcaiq lij miz faj- naj gyoengqvunz riunyumnyum. Doengh fajnaj riunyumnyum neix couhdwg gij biujcingz Cungguek seizdaih moq. Moix aen naj riu ndawde, miz maqmuengh, miz simhoengz, engq miz gij ligliengh haenqrengz bongh baenaj. Moix aen naj riu, geiq le geijlai gojgaeq buekguh gaenxguh ha! Beksingq raeuz geijlai sim’angq, saedceij yied gvaq yied ndei, yamqdin hix yied byaij yied onjdingh.

Ciengz ciengq duetgungz bang- hoj ndaej hingz, liz mbouj ndaej Cungguek Gungcanjdangj. Mbanj- cuengh yinzminz raeuz gaen dangj byaij, caezgya caez yamqdin, vih caux gij saedceij gyaeundei、saed- yienh caez fouqmiz, mbouj lau baeg、 gwn ndaej haemz. Gvangjsih raeuz miz boux yienghndei banggungz gungcanjdangjyenz Vangz Vwnzsiu. Vangz Vwnzsiu naeuz:“Gizgyae, miz ginzcung cingq heuh, gou aeu hwnjdin lo, gou miz saenqsim, mbouj dwk hingz ciengz ciengq neix, baenzbaenz cungj mbouj soubing.” De daiq gij saenqniemh yienghneix, roengzrengz guh hong bonjfaenh, doeklaeng deng dai, baenzneix oiqcoz, hojsik lai lo. Guek raeuz lij miz ciencien fanhfanh gungcanj- dangjyenz, lumj Vangz Vwnzsiu yienghneix, ndwn youq gizgiz, laebdaeb haeb heuj roengzrengz guh, goq Cunghvaz Minzcuz aen ranz hung neix, hoeng cix mbouj ndaej hoengq goq aen ranz iqetet bonj- faenh. Seizgonq gungcanjdangj- yenz aeu lwedhanh laeb le Cungh- vaz Yinzminz Gunghozgoz, seizneix gungcanjdangjyenz aeu lwedhanh vih lwgminz caux aen ngoenzcog moq, vih guekgya raeuz vih Cunghvaz Minzcuz raeuz caux aen ngoenzcog moq.

Buetfoedfoed baenaj, mbouj ndaej doiqlaeng, dwg vahmieng rengzrwd gungcanjdangjyenz, hix dwg gij sawjmingh gungcanj- dangjyenz. Gungcanjdangj itsim vih yinzminz vih beksingq ndaej gvaq hwnj gij saedceij engq ndei, vih Cunghvaz Minzcuz ndaej fukhwng, gyoengqde caeuq lwgminz sim dox- lienz, caez diemheiq, caemh diuz- roen, dawz lwgminz haeuj ndawsim, vih lwgminz banh saehsaed mbouj dingz.

Seizneix, Cungguek yinzminz couh yungh gij song fwngz gaenx guh, yunghsim nyinhcaen, veh ok fuk veh gyaeundei Cungguek, angq- hoh laeb dangj bak bi!