2

Daxmeh Siujvwnz baenz bingh lo, canghyw naeuz yaek guh soujsuz, yaek yungh haujlai cienz. Daxboh dawz doxgaiq ndaw ranz dijcienz haenx cungj gai lo, youh caeuq caencik baengzyoux ciq di cienz he, hoeng lij ceng cienz guh soujsuz bengzcaeng haenx haujlai.

Daxboh siengj daengz goyizcienz ndawhongh, gietdingh gai go faexyizcienz neix bae. Siujvwnz dai cungj mbouj haengj, de mbouj bae hagdangz, daengx ngoenz umj gofaex, mbouj gwn mbouj ninz.

Daxboh hat Siujvwnz: “Meh mwngz youqgaenj, lijdwg go faex neix youqgaenj!”

Siujvwnz mbouj gangj vah, cij dwg raemxda lae mbouj dingz. Daxbuz gienq Siujvwnz, gienq dwk gienq dwk, swhgeij hix daej lo.

Dwg ha, go faexyizcienz neix daiq hawj saedceij Siujvwnz caeuq aen ranz neix geijlai angqyangz ha!

Siujvwnz daej dwk daej dwk, gutgungq youq goek faex, ninzndaek lo. De gaenq geij ngoenz geij hwnz mbouj laep da, saedcaih dingj mbouj ndaej lo. Daxboh umj de haeuj ranz bae lo.

Swnh Siujvwnz ninzndaek, boh Siujvwnz heuh geij boux vunz daeuj, lienz raemj daiq gawq, doxcaez dawz go faex neix raemj roengzdaeuj lo.

Siujvwnz deng sing goyizcienz laemx roengz cauz ndiu lo, de lumj fatbag nei buet ok ranz bae, yawjraen goyizcienz laemx youq gwnz dieg, de siengsim dwk daejnga’nga lo.

De daej haemz daej manh, gyoengqvunz dingq ndaej sim cungj cieg lo.

Daxbuz buet gvaqdaeuj, umj dawz Siujvwnz, nai de.

Siujvwnz ndang baez unq, laemx youq ndaw rungj daxbuz, maezmuenh gvaqbae lo. (Gyah Yingj)