Gou mboujcij baez ndeu siengj gvaq, guekcoj, dauqdaej dwg gijmaz? Gou siengj ha siengj ha, moix baez siengj hwnj “guekcoj” song cih saw neix, ndawsim couh gamjdaengz unqnem, ndawda couh aeng miz raemxda, lwed ndawndang couh ndatfwd laedoengh……

Guekcoj dwg gijmaz? De dwg bya, dwg haij, dwg ndoengfaex, dwg diegnywj, dwg lajmbanj, dwg ndawsingz, dwg diegsa gvangqlangh yawj mbouj raen henz, dwg diegbya sangdaemq doxrangh.

Guekcoj dwg gijmaz? De dwg hoenz- feiz, dwg sauqroegbeggap, dwg ruzlungz nguxnyied co’ngux, dwg bogfeiz bet nyied cibngux, dwg sing hemq yiyi yaya lwgnding ndaw gyoivenj, dwg bingj daxmeh youq ndaw rek cien okdaeuj, dwg vahdaengq daxboh mwh okdou bae gizgyae.

Guekcoj dwg gijmaz? De dwg gij naemjngeix Gungjswj、Laujswj、Canghswj, dwg gij sei Giz Yenz、Lij Bwz、Luz Youz, dwg gij sanjvwnz Hanz Yi、 Liuj Cunghyenz、 Suh Si, dwg gij swz Lij Yi、Lij Cinghcau、Sinh Hiciz, dwg gij veh Bazdasanhyinz、Cwng Banjgyauz、 Ciz Bwzsiz, dwg gij suhfaz Mij Fuz、Vangz Sanhguz、Linz Sanjcih, dwg gij cauhguh vunz coengmingz ndaw banlaux gyoengq- raeuz guh haenx, dwg goenglauz doenghgij daihsae gou gingqcungh haenx.

Guekcoj dwg gijmaz? De dwg heifouh baez youh baez, doiqdingj baez youh baez, saetbaih baez youh baez, haenqhwnj baez youh baez. De dwg cungq ndaw fwngz cansw, dwg lwed gwnz ndang cansw, dwg angqfaengz ndaej hingz le, dwg baenz yieb baenz yieb faenzcieng gwnz saw lizsij mbouj nduknaeuh haenx.

Gwnzbiengz miz haujlai dieg gyaeu- ndei. Hoeng, gizde miz Byavangzsanh lwi? Miz Dahvangzhoz lwi? Miz Dahcangzgyangh lwi? Miz Cangzcwngz lwi? Miz bauei mwh daxmeh seng gou haenx lwi? Miz rizdin gou baez yamq baez yamq bin bya dangh raemx gvaqdaeuj haenx lwi? Miz gij fungsug gangj mbouj caenh gou caeuq vunzcaen gou gaenq sibgvenq haenx lwi? Miz gij fwen ranzmbanj gou baez hai bak ciengq couh roxnyinh rwenzrwd haenx lwi?

Mbouj miz. Gawqyienz gijneix cungj mbouj miz, yienghneix, guekcoj couh dwg gizdieg mbouj ndaej lawh ndeu.

Guekcoj, de dwg souj go ndiepgyaez ciengq mbouj sat ndeu, dwg faenzcieng ndei sij mbouj caenh ndeu. De dwg gizdieg cojcoeng raeuz caeuq gij cojcoeng cojcoeng gwndaenj sanj lwglan daih youh daih haenx, hix dwg gizdieg lwglan raeuz caeuq gij lwglan lwglan gwndaenj hwngfat haenx.

……

Hawj raeuz engqlai roxyiuj ngoenz- lwenz guekcoj, hix engqgya roengzrengz hwnqguh ngoenzneix caeuq ngoenzcog guekcoj! Daengzcog dwg gvihaeuj Cung- guek! Daengzcog Cungguek gvihaeuj boux- coz!

( Daj《Geiq Cimh Loq Cangh Gez Sanjvwnz Cingsenj》 senjaeu)