贵港市覃塘区蒙公镇高占小学四年级 Lij Yingzyingz/李莹莹

Ngoenzneix banringz dangz banhoih, daihgya gig angq, aenvih lauxsae yaek daiq dou guh aen youzheiq gig mizyinx ndeu, haenx couh dwg nem aenndaeng.

Baez hwnjdangz, Lij lauxsae couh gaem mbaw siengq lwgnyez gyaeuj hung mbouj miz aenndaeng ndeu daeuj, heuh banhcangj nem youq cungqgyang gwnz hwzbanj. Lwgnyez doiq lwgda ndongqliklik, bwnda gungjngetnget, aenbak iqetet, naj luenzlulu, dwggyaez raixcaix. Hojsik mbouj miz aenndaeng, doiq da hung de cingq muengh dou, lumjbaenz doiq dou naeuz: “Daeggo dahcej, sou bouxlawz daeuj nem aenndaeng gyaeundei hawj gou vei!”

Youzheiq hainduj lo, Lij lauxsae riu naeuz: “Yawj bouxlawz nem ndaej vaiq youh cingq.” Lij lauxsae vah ngamq gangj sat, gyoengq doengzhag ceng gonq lau laeng dwk yaengx fwngz hwnjdaeuj, sing hung naeuz: “Gou daeuj!” “Gou daeuj!” Hoeng, Lij lauxsae bienbien yawj hwnj gou. Gou daekeiq fwngfwng byaij coh gangjdaiz, ndwn youq gizdieg lauxsae dingh ndei haenx. Lij lauxsae naj riunyumj hawj gou daiq gaiq baengz cw lwgda ndeu, gou sikhaek gijmaz cungj yawj mbouj raen lo, lauxsae lij heuh gou youq gizde cienq geij gien, yienghneix gou gyaeuj miz di ngunh lo, saemxsaemx saxsax benz hwnj gangjdaiz. Gou sien aeu fwngz lumh- lumh mbawsiengq, youh yungh lwg- fwngz dag yaep he, couh menhmenh dawz “aenndaeng” nem hwnjbae, lij caengz caj gou cienq ndang gvaq- daeuj, gyoengq doengzhag youq baih- laj couh riuhoho lo, gou duet gaiq baengz cw lwgda roengzdaeuj, nu lwgda baez yawj, swhgeij hix riu ndaej bak hab mbouj hwnj lo. Yienzlaiz gou dawz aenndaeng nem fanjbinj lo—— Congh ndaeng daengj coh baihgwnz! Gou sim siengj: Danghnaeuz de swiq naj, haenx mbouj dwg dawz raemx guenq haeuj ndaw aenndaeng ma, aenndaeng couh ndaej dang aen “caeng raemx” lo.

Doeklaeng, gyoengq doengzhag laebdaeb hwnjbae nem aenndaeng, hoeng, mbouj dwg nem mbeuj le, couh dwg nem ngeng lo, mbouj miz saek boux nem ndaej cingq, daeuq ndaej lauxsae caeuq dou cungj riuhaha, miz mbangj riu ndaej raemxda cungj conh okdaeuj lo.

Roengzdangz lo, dou gig sij mbouj ndaej dingz roengzdaeuj, ngoenzneix dou guhcaemz ndaej caen sim’angq ha!

(boux lauxsae son’gyauq： Veiz Gyanghbingz)（指导老师：韦江萍）