Buhvaq Siujvwnz bingzciengz daenj haenx, cungj dwg daxbuz daj ranz buznax vaq aeu. Ranz buznax miz daeg gobiuj ndeu, maj ndaej bizbwdbwd, buhvaq de youh gvangq youh hung, vanzlij youzywdywd dem. Daxbuz dawz ma ranz, saeg le youh saeg, fong le youh fong. Siujvwnz maj ndaej byombyang, daenj hwnj buhvaq gobiuj, yawj hwnjbae lumj gaiq faexsaux daep mbaw geiz vaih ndeu, gyoengq doengzhag cungj laeglemx riu de.

Cijmiz youq mwh goyizcienz hai va, Siujvwnz cij roxnyinh swhgeij sawqmwh baenz boux vunzfouq ndeu. Daihgya raen de cungj dwg naj riunyumj, lumjbaenz lumz de miz daxmeh ga gyad ndeu caeuq geubuh vaih gwnz ndang de lo.

Hix cijmiz youq mwh goyizcienz hai va, aen hongh Siujvwnz caemcingx haenx cij bienq ndaej nauhyied lo, ndawhongh cungj dwg gangj faengz riu angq.

Doengzhag sai doengzhag mbwk ndaw ban ceng dwk daeuj yawj vayizcienz ranz Siujvwnz. Gyoengq doengzhag sai bin hwnj faex bae, song fwngz duengq ngafaex bi nungxnengh, daj nga neix duengq daengz nga de, saekseiz mbaet aeu vayizcienz oet haeuj bak bae. Doengzhag mbwk mbaet nye va gvaengz youq gwnz gyaeuj, guh baenz gvaengzva ndeiyawj, miz mbangj gip va loenq gwnz dieg, bau haeuj mbawceij bae, guh baenz daehhom.

Siujvwnz ndwn youq laj gofaex, mbouj caeuq gyoengq doengzhag sai guhcaemz, hix mbouj caeuq gyoengq doengzhag mbwk guhcaemz, cij dwg ngawzngwd yawj gyoengqde. Yawj dwk yawj dwk, mbouj rox baenzlawz lo, raemxda de couh lae okdaeuj lo. De siengj, danghnaeuz vayizcienz ciengxlwenx mbouj loenq couh ndei lo. Vayizcienz loenq le, daihgya youh dauq lumz de, dangq mbouj miz de, roxnaeuz saekseiz aeu de dangguh vahriu daeuj gangj de.

Daxbuh daj ndaw ranz byaij okdaeuj, yawjraen Siujvwnz ngawzngwd ndwn dwk, ndawsim gig nanzgvaq. De rox aen ranz neix cawzliux hawj lwg neix deng vunz riu, gijmaz hix hawj mbouj ndaej de. Siengj daengz gijneix, daxbuz couh engqgya ndiep Siujvwnz, couhcinj de miz gak cungj gak yiengh gezdenj iq.

Daxbuz dawz ok bingjvayizcienz cwng ndei haenx, heuh gyoengq lwgnyez gvaqdaeuj gwn. Ndwen gonq, daxbuz couh hainduj bwh mienh caeuq youzlwgraz guh bingjvayizcienz lo. Bingzseiz ndaw ranz sij mbouj ndaej gwn gijneix bw.

Siujvwnz rubrab gwn geij gaemz couh imq lo, yawj gij yiengh angqfaengz daihgya, sim de couh deng cungj muenxcuk geizheih he saek ndaej rimcangcang lo. (Gyah Yingj)