——Doeg 《Lwgvuengz Iq》 Gamjsiengj

——读《小王子》有感

Youq ndaw sujgyaj, gou caeuq daxmeh doxcaez doeg bonj saw 《Lwgvuengz Iq》. Dou doengzcaez ra raen haujlai gyaeundei, itheij sou ndaej vuenyungz rimradrad.

Dang dou doeg daengz：“Siengj daengz gij cingzgingj daengx gyoengq duzciengh gaet faexceizlingz, lwg- vuengz iq nyaenx mbouj ndaej riu ok sing lumj ngaenzlingz nei.” Daxmeh riu ok sing, de naeuz seiz lwgnyez mbouj miz gij gyaeundei neix, youq ndaw bonjsaw lwgvuengz iq hawj de bouj dauqma lo. Gou hix riu lo, lwgvuengz iq geijlai rox siengj, gawqyienz dwg gofaex hungsang lumj aen’gyaudangz nei, yienghde raeuz couh dawz gyoengq ciengh baenz duz baenz duz dieb hwnjdaeuj! Baihnaj gou hix lumj okyienh cungj cingzgingj neix, dou cungj sing hung riu hwnjdaeuj! Haenx dwg ciengzmienh geijlai ndeiriu ha! Baenz gyoengq duzciengh hung duz dieb duz gaet faexceizlingz! Caen dahraix, lauxsae gangj gvaq, bonjsaw ndaej daiq dou bae lingh aen seiqgyaiq bw!

Dou doeg daengz：“Gyanghaet riengx bak swiq naj dajcang ndei le, itdingh sijsaeq baet aensinghgiuz seuqsaw bae, aenqseiz bae ciemz faexceizlingz……” Lwgvuengz iq nyinhcaen dajleix aen singhgiuz de, ciuqgoq vameizgveiq de, baetseuq byafeiz……Gij saeh neix gig mbwq, hoeng, de nyinhnyinh caencaen. Daxmeh gangj haenx dwg gyaez caeuq cwzyin.

“Mwngz ne?” Daxmeh yungh fwngz lumhlumh gyaeuj gou, gou nyinghcaen dwk ngaekngaek gyaeuj, baezlaeng gou itdingh aeu miz cwzyin, gag bae guh hongranz.

Gou daegbied maij gawq vah ndaw bonjsaw, duz nyaenma gangj gvaq: “Danghnaeuz gou banringz seiq diemj cung ninz singj, yienghneix daj sam diemj hwnj, gou couh hainduj roxnyinh vuenyungz lo. Seizgan yied depgyawj, gou couh yied roxnyinh vuenyungz.” Gou lumj duz nyaenma ityiengh, cungj dwg baenzneix maq- muengh vuenyungz, moix ngoenz deng haeuxcaeux rangfwdfwd haenx oenq singj, ngoenz gyaeundei ndeu hainduj lo! Gwn imq ndoet gaeuq, bae gyanghongh iq yawj vameizgveiq gou, byoz vameizgveiq cungj dwg duh gou. Gou rwed raemx hawj de, gaeb duz nonheu gwn mbaw oiq de bae. Gou siengj: Byoz vameizgveiq swhgeij hix lumj vameizgveiq lwgvuengz iq it- yiengh, mbouj caeuq vunz doengz.

Daxmeh cix naeuz de ceiq maij gij vah duz nyaenma gangj haenx: “Cijmiz yunghsim cij yawj ndaej cingcuj, aeu lwgda dwg yawj mbouj ndaej raen gij siengj ndawsim. ” Dwg ha, lwgda dwg yawj mbouj raen ndawsim vunz.

《Lwgvuengz Iq》bonj saw neix daiq hawj gou caeuq daxmeh cungj dwg nditrongh, cungj dwg vuenyungz!

（指导老师：韦江萍）