Ngoenzneix, lauxsae louz yiengh cozyez ndeu, dwg heuh dou ra mbawfaex. Ngoenzcog dawz mbawfaex daeuj, gyoeb baenz boux vunz ndeu roxnaeuz duz doenghduz ndeu. Couh yienghneix, dou maranz hainduj ra mbawfaex.

Gou ma ranz aeu cozyez guh sat gonq, yienzhaeuh dawz aen daeh ndeu bae ra mbawfaex. Najranz gou couh maj miz mbawfaex yienghceij mbouj doxdoengz, mbatneix ndei lai lo, gou gag siengj. Gou aeu moix cungj mbawfaex cungj mbaet gvaq baez ndeu, hung、iq、raez、dinj, mbouj miz saek mbaw gou mbouj mbaet aeu. Doeklaeng gou youh bae daengz ndaw reih, ra le haujlai mbawyinzging、nywj、va, dauqdaej mbaet liux lo. Couh yienghneix, gyanghaemh gou simcingz angqvauvau haeujninz lo.

Ngoenz daihngeih dangzgoq daihseiq daengz lo, dou dawz mbawfaex okdaeuj hainduj gyoeb lo. Gou vaiqvet dawz mbawfaex okdaeuj, lauheiq seizgan mbouj gaeuq. Ciuq giva, gou siengj guh dah niq daenj buhvunj ndeu, couh guh hwnjdaeuj lo. Gou guh geuvunj de gonq, gou aeu mbawyinzging baenz mbaw baenz mbaw dab youq doxcaez, geu vunj henj he couh gyoeb okdaeuj lo. Ciepdwk, gou youh guh aenhwet caeuq aenhoz de, gou dawz song aen neix gyoeb youq doxcaez, couh dwg ra song gaiq mbawliux, daet mbat he, ndanggwnz couh guh ndei lo. Gaenlaeng dwg fwngz, gou yungh mbawfaex youh saeq youh raez he guh fwngz de, lij guh aen dungcoz cabhwet. Ciepdwk guh aengyaeuj, gou yungh geij duj va guh aengyaeuj de, caiq yungh mbaw iq he guh da de, doeklaeng gou youh guh geij gofaex, hawj dahniq youq laj raemhfaex diuqfoux.

Baez cozyez neix caen dwg mizyinx lai lo!

(ngeih nienzgaep Liuz Sezfeih)