Mehsimj baetseuq couh lumj gaiq sauqbaet ndeu, baetseuq sojmiz nyapnyaj, couh lumj gihgi sup faenx, supdeuz sojmiz namhfaenx, couh lumj raemx siudoeg, siumied sojmiz sigin……

Geiq ndaej ngoenzhaenx, dwg ngoenz baiq goengsaenz, ranzranz cungj gaj gaeq gaj bit, bae henzdah ndaw mbanj ciemz bwn hai dungxsaej swiq seuq. Seizneix, diuzdah bienqndaej youh uq youh haeu lo. Gyoengqvunz swiq bitgaeq seuq maranz le, mehsimj baetseuq couh sikhaek gwih gyaq ci’nyapnyaj de, daeujdaengz diuz dah neix cingleix nyapnyaj. Gou cingq youq gwnz ranzlaeuz dak buhvaq, gyaegyae couh yawjraen mehsimj baetseuq lo. Cijraen de daj ndaw ci dawz ok hongdawz cingleix, daenj madfwngz, daiq mauhnyangj, daenj ndei buhraemx, gaem dawz fag nep raez ndeu caeuq aen daehnyapnyaj hung ndeu, mbouj lau uq dangh roengz ndaw dah youh uq youh haeu bae. Gou ndawsim siengj: Mehsimj mbouj lau uq mbouj lau haeu ma? Danghnaeuz dwg gou, itdingh mbouj gamj dangh roengz dah bae. Hoeng cijraen mehsimj baetseuq fwngzswix gaem daehnyapnyaj, fwngzgvaz gaemdawz fagnep raez, gungj aenhwet, iet ok fagnep raez nep dungxsaej bitgaeq caeuq nyapnyaj ndaw dah, cuengq haeuj ndaw daehnyapnyaj bae. Mehsimj baetseuq dungcoz de dwg yienghneix riengjret, saedcaih hawj vunz boiqfug. Gou dinghngae’ngae yawj dwk, da gou gaen fagnep raez gwnz fwngz de cienq bae cienq dauq. Buenq diemj cung gvaqbae lo, nyapnyaj ndaw dah gaenq cingleix ndaej ca mbouj geijlai lo, hoeng mehsimj baetseuq lij caiq yawj bae yawj dauq, mbouj lamqgvaq diuq nyapnyaj ndeu. De baez gek yaep ndeu yungh genbuh uet hanh gwnz najbyak, mehsimj baetseuq ha, mwngz daiq sinhoj lo! Daengngoenz ndatfwdfwd, duzbid ndat ndaej youq gwnz gofaex hemq mbouj dingz, gou youq ndaw ranz hix gamjdaengz ndat ndaej gig nanzsouh. Hoeng mehsimj baetseuq cungj mbouj goq gij nditndat neix, hanh lae hanh roenx vih gyoengqraeuz haenqrengz cauh aen vanzging seuqsat cwxcaih ndeu.

Mehsimj baetseuq baenz aen funghgingj gyaeundei lajmbanj mdeu, dwg boux ceiq gyaeundei lajmbanj! Nanhdauh mbouj dijndaej gou boiqfug ma?

(boux lauxsae son’gyauq Cinz Hungzmeiz)